جود السحت

كسّابة السحت جود السحت مالي به
وش لي بجود المرابي والحراميه
الجود جود الذي شرعاً مكاسيبه
لو كان مايملك الا نصف ربيّه
نرضى ونقنع قراه اللي يقرّي به
ونحسبه نارن على ضلع الكرم حيه
زادوا شيوخ الكرم بالشك والربيه
غلاتهم من حلال الناس ممليه
نهابة المال بالخسران والخيبه
يوم القيامه بنار الويل مصليه
الرجل منهم ملى من سرقته جيبه
ويقول انا الشيخ والهقوه سماويه
يلبس له البشت ويسحب عراقيبه
ويركي دلاله ويشري بايع النيه
قامت ضعاف النفوس تقول ياطيبه
شيخن ولد شيخ ماجاته بعاريه
في مجلسه تمسح اكفوفه واشانيبه
تتبعه تبع المقيض لبارد الفيه
وان جا يصلي لو القبله على سيبه
وراه صلو صلاة السر جهريه
وان جات للصح ماتحصى عذاريبه
لكن ذمة ردي الساس مشريه
عيبن علي امدح السارق واماري به
في سلمنا مدحت السارق دناويه
يوسف الشمراني