قصيدة وتر / تناديك ❤️️

قصيدة وتر

تناديك

تناديك رغبات المقابيل
من الأرض وأنتِ بالمجرة
تهادي على غصنٍ من الليل
وتمادي على القلب ومقره
ترى كل هالدنيا تساهيل
ما دام إننا بنعيش مرة
تلدين وتزين التعاليل
تصدين وتصد المسرة
وأناديك ودموعي هماليل
وفي الصدر تنهيده وحرة
أحبك وما للحب تأويل
ولا شفت منك إلا المضرة
وتموني يا ريم المكاحيل
على القلب في خيره وشره
إذا جيتي أستاهلك بالحيل
وإذا كان ما تبغين حرة
فديت الوسيعات المظاليل
رماح الهلاك المستشرة
وخطواتك اللي بالخلاخيل
لها في الصدر والقلب جرة
وسواليفك بكل التفاصيل
وصوتك بها لله دره
أبي منك ما ينهد لي حيل
على شيء ما يسوى المضرة
وأبي صادقات التهاليل
إذا جيت أبشكي وأتشره
من الحظ وأشباه الرجاجيل
وعثرات وقتي المستمرة
وطموحاتي الغر المحاجيل
وخذلانها مع كل كرة
أعدل المساوي يطيح قنديل
وأهز الجفن وتطيح قرة
وأناديك ودموعي هماليل
وفي الصدر تنهيده وحرة
أحبك وما للحب تأويل
ولا شفت منك إلا المضرة


كلمات/ ياسر التويجري