قصة وقصيدة

هذه قصة الشاعر / جازي بن مرجي السليمي الحربي
من اهل البادية وقعت في بادية القصيم وكان هذا الشاعر مريضاً بالحمّى وكان في الفراش لايستطيع الخروج منه من شدة مابه وكان له طفل اسمه فهد يبلغ من العمر سنة وثمانية أشهر وكان الطفل يبكي لمدة اكثر من ساعة مستمرة وينادي والده بطريقته الطفولية وكان والده يسمعه ولايستطيع اجابته من شدة التعب رغم وجوده في بيت الشعر بالرفّه { المجلس } بجوار الخيمة التي ينادي منها الطفل وكانت أمة تمنعه الذهاب لوالده لكي لايزعجه وهو مريض ولكن حينما بدأت الام في صلاة المغرب جاءت الفرصة للطفل بالخروج من الخيمة والذهاب لوالده وبعد ماشاهد والده ذهب مسرعاً وانطوى عليه فرحاً به ثم بدأ بالكف عن البكاء واستقر بجوار والده ثم نام قرير العين مما جعل والده تذرف عينه من الدمع على موقف ابنه وجعله يتذكر فضل وجود الوالدين الذي فقده هذا الوالد وهاضت قريحته قائلاً :

ذكرتني يافهيد حب الحبيبين
أبـوي وأمٍ مالـحقـنا جـزاها

ذكـرتني يانور عيـني بغالين
روحي عليهم يجبر الله عزاها

البارحة يوم أنت واقف تنادين
خليت عيني ينثر الموق ماها

خليت دمع العين يجري من العين
من فوق وجناتي نزيفٍ كساها

دمعات عيني كل ليلة اساقين
لاشـك ماينـفع عيوني بكاها

نبكي عليهم من قلوبٍ محازين
والقلب لوعات الفراق اشتكاها

نشكي على الله ماعلى الناس شاكين
اللـي رفـع سبــعٍ وسبــعٍ دحاهـا

يافهيد بامر الله على الخلق راضين
اللي عـلى غيـره حـكم فـي فناها

وقارنت في حبي لكم حب الاثنين
يابِـعْـد عنـكم يافهـد مسـتـواها

ابوي ياخذ بي على المتن يومين
ويلحق بي العزبات بأقصى ضماها

يمشي بنا الوالد على اقدام رجلين
ومن شاننا روس الافاعي وطاها

ولاصـار مـابالبيت شـيٍ يغذين
ارواحـنا درّ العـشايـر غـذاهـا

كم ليلةٍ نشبع يباتون مقوين
وتترك لنا الام الحنونه عشاها

علي يامظنون عيني لهم دين
ماتو ونفسي مالحقت به مناها

حـقٍ عليـنا نجـزي الـزيـن بالـزيـن
يجزى راع الحسنى بحسنى كماها

البِـرّ ماهـو بـس لاصـار حيـيـن
لو انّـهم بلـحـودهـا فـي رجاها

مادامـنا يافـهيد بالـوجـد حـيـيـن
مانسى حقوق اللي حقوقي عطاها

وجدي عليهم مير مافي يدي شين
احـكـام رب الـبيت فـينـا قضـاهـا

لو انتـصـور يافـهـد مابـهـا زيـن
دنيـاك عفـنـا يافـهـد مـاوراهـا

خانت هل الطاعات هم والسلاطين
خــوّانــةٍ مـاعــاد تِحــمى حــماهـا

ماكنّـهم داجـو على القـاع ماشين
ولاتقـل داجـو يافـهد فـي وطاها

جرّتهـم الدنيـا على العـسر واللين
وغصبٍ على القاسي يلين لقساها

عندي قريب وكنّهم من ورى الصين
وياقـريبهم يافهـيد لو هـم وراهـا

في ماقـعٍ مايقتـضيـبه راع الديْن
لاشاف به خصـمه حقـوقه نساها

الموت سنة والبشر فيه دارِين
نفسٍ تموت ونفس مقبل سراها

شـيٍ وكـاد وما مضى له براهين
من خلقة آدم لين تطوى سماها

ياللـه ياقـابـل صـلاة المصـلين
يامنزل الحكمة على من تـلاها

عـلّام مايخـفى وعـلّام مايبين
يامن جميع الخلق عينك تراها

يامن خلقت آدم وحوّى من الطين
وجمـعتهم عقـب الفـراق ولقـاها

يارب ياعـدّال ميـل الموازين
يامنـزلٍ سورة تبـارك وطاها

يامنزلٍ سورة تبارك وياسين
على النبي الهاشميّ وقراها

على النبي سيّد جميع النبيين
اللي جميع الخلق هو مصطفاها

تجعل لهم في جنة الخلد تأمين
وانـك تـذرّي والـدَيّ بـذراهـا

وامواتنا واموات كل المسلمين
ارواحهم جعل النعايم اغطاها

الشاعر / جازي بن مرجي السليمي الحربي