نطوي مع الأيام

نطوي مع الأيام عـام ٍ ورا عـام
وتمر ساعات الفـرح فـي دقايـق

أيام راحت بالعمر مثـل الأحـلام
يوم ٍ بهـا زعـلان وأيـام رايـق

درست من دنياي وأتعبت الأقـدام
وبدلت عن بعض الطرايق طرايـق

وكفخت بأفكاري كما الطير لا حام
وما عاقني عن ماكـر العـز عايـق

يا صاحبي خذني معك سيف وحزام
وياك في وقت الرخـا والضوايـق

وترى البشر يا خوك منقسمه أقسام
بين الردي والطيب شفت الحقايـق

لقيت من صلى وزكى ومن صـام
ولقيت من هو لأقرب النـاس بايـق

ولقيت من قلبه حقـود ٍ ونمـام
ولقيت من قلبـه يعـز الرفايـق

ولقيت من يبني الأمل فوق الأوهام
واللي يموت ولا يعـرف الاالعوايـق

ولقيت من يملك بساتيـن وأنعـام
واللي من الحاجة ينـام متضايـق

الله خلق هالخلق سـادة وخـدام
ذي دبـرة الرحمـن رب الخلايـق

وآخرك يابن آدم ترى قطعة الخـام
أمـراً أكيـد وما يبيلـه وثايـق

يالله عسى ما أكون قطاع الأرحـام
وعساي من عقب القبر في حدايـق

جاك الكلام وخذ معه بصمة إبهـام
إن العمـر كلـه مجـرد دقايق




مطلق الثبيتي