ديوان شعراء السعودية في العصر الحديث (متجدد)☘️☘️

يبعد هموم القلب



لي صاحب منساه والله منساه


والله منسى ما مضى من حسانيه
إلى طرا لي جض قلبي من اقصاه


يكفخ وقلكن يغضبنه مجانيه
يا حلو شوف اللي تبي عقب فرقاه


يرضيك بالنفس العزيزه وترضيه
ترضيه باللي يشتهي ما تغالاه


الموجب انه قد ملك بحسانيه
وتفوز حالك عقب شوفه ولاماه


ولذاذة الدينا حبيبك تناديه
الله خلق صافي جبينه وسواه


ومكمله بالزين والملح والتيه
يبعد هموم القلب شوة محياه


والقلب مني يحضرن به نواميه
اضحك إلى شفته وتضحك ثناياه


والقلب باسرار الموده يناجيه
انا له الجا من ابوه ودناياه


ويكن لي حب على الناس يخفيه
وانا جعلت الروح له من فداياه


قلبي لحبه خالق الكون هاديه
قالو تعرفه قلت واعرف حلاياه


بدر وكل الخلق مثلي تراعيه
فيه لابها من معدن الدر مجناه


ما شفت مخلوق بشكله يحاليه
قلبي بحبه مغرم بالهوا تاه


ماش بدرب الحب يسعى بواديه
يطري عليه اللي خذ القلب وادماه


قالو ترده قلت لا لا ولا اعطيه

محمد الأحمد السديري

جرت دمعتي



تذكرت يا زبن العتيبي وشاقني


خليل وخلا دمعت العين ذارفه
جرت دمعتي من جور ودن بضامري


ولو دمعتي نهر شكا الكود عارفه
عصا الود بفوادي وهاجت صبابتي


والروح مني من خطرها مشارفه
تمنيت لو مي سلا القلب ودها


وتمنيت لو ربي عن القلب صارفه
ولكن يميل القلب يا زبن يمها


على زول مي ليناتن محارفه
انا احس شوق للغرام يهزني


ان شفت من عربان اهل مي طارفه
يا زبن عجات الهوا تجرح الحشا


دخلت باشراكه وانا قبل عارفه
وتمكن مكين الود واجتاح مهجتي


وكم قلب عشاق هوى الحب جارفه
على ما جرى عيني تغضب نظيرها


ولكن ظفر الطير يا زبن طارفه

محمد الأحمد السديري

ونات الحشا



كل ما جريت ونات الحشا

زادت الونات في قلبي جروح

من هو اللي ما على الدنيا مشا

مثل زوله لا ومنشي فلك نوح

يوم شفته فز قلبي وانتشا

وابدلت روحي بعد شوفه بروح

قال طامع قلت لا لا لا حشا

بس ابي من فاك يالغالي صبوح

نور خدك مثل براق نشا

ضاح لي في نور وجهك نور ضوح

يا حبيبي لا تطاوع من وشا

من حكى بفراقنا قله يروح


محمد الأحمد السديري

لا وا عشيري



ونيت يوم الناس تضحك وتطرب


وسهرت يوم الناس نوما هجوعي
على الذي حبه لقلبي تشرب


في ضامري صكت عليه الضلوعي
عني بعيد ودونه الشوف سرب


وانا على فرقاه قلبي جزوعي
لا وا عشيري كل ما قلت قرب


قفت نجوعه عن حراوي نجوعي
هواجسي يمه خفاف وهرب


وذكراه للقلب المعذب متوعي
في وليته يا زبن ما راقب الرب


وانا اتجرع من فراقه دموعي
يا زبن عني مغزل العين غرب


ومن الفافي بيننا ما يروعي
يا زبن يابوعمير يابن المعرب


اثر الهوا يا زبن جرحه يروعي
ان جيت عن بحر الغرام اتهرب


يطري على بالي حسين الطبوعي
انخاك ياللي بالمراجل مجرب


يا فزعتي وان كان قلت فزوعي

محمد الأحمد السديري

يسقيك يا لطايف



يسقيك يا الطايف من الوسم رعاد


وبل على وبل يعلك ويرويك
في كل فج لك مع المزن ميعاد


تسيل وديانك وتخضر مفاليك
حيثك مقر الزين مركوز الانهاد


طفل سبل عقلي ولا فيه تشكيك
ناديت باسمه بين صادر ووراد


وقالو هله مضنون عينك يناديك
واقبل على اللي له القلب ينقاد


وبشرت قلبي قلت زارك مصافيك
بشرت قلب من عنا الوجد قد باد


جاك الحبيب اللي بسره يناجيك
سلم وجاوبته بدرات الانشاد


قلت السبب هوليه تبعد مشاحيك
يقول انا اللي مصخر لك بالوداد


لو طالت الايام فالقلب يرجيك
وحبيت مبسم كاعب بالبها زاد


عن كل مخلوق من الناس يغنيك
يا زين كان انك عن الحب نشاد


انشد جريح القلب والقلب ينبيك
ينبيك عن ود الضماير إلى كاد


وتشق جيبك عند غاليك بيديك
انا وقلبي أي ريش العين بجهاد


ان غبت عني بس قلبي راعيك
يشي لمن جور الهوا حمل الانكاد


يا مورد الخدين باسماك يدعيك
القلب ماله عنك يا زين رداد


بلاه والله يا ريش العين يغليك

محمد الأحمد السديري

من يم خلي


ان كان تنشد عن قرايض علومي

يبوهلا قلبي تزايد هيامه
يا سعود مع العين غرق هدومي


يشدي هماليل السحاب انشامه
على عشير كل قومه وقومي


ضدي وضده معلنين القوامه
قلت الوعد قال السما به غيومي


وثر حبيبي خايف من عمامه
عني نحو به قاطعين السلومي


وعليه لحقت الندامه ندامه
من يم خلي ما تجينا العلومي


كن العواني قطعن عن تهامه
عن شوف وضاح الجبين محرومي


والقلب من بد المخاليق رامه
مالي حدا الا عضتي بالبهومي


وساعة فراقه مثل يوم القيامه
طفل على فرقاه تكثر همومي


عنده إذا قلبي وعنده فطامه
بالليل اساهر ساريات النجومي


والصبح اعدي ما نبا من عدامه
غلاه علق بالضماير سهومي


وبالقلب من جرح الموده علامه
الله يلوم اللي لقلبي يلومي


قلب صعب ما ينعذل عن مرامه
قلب صعب قاس قوي عزومي


محد يعذله عن هواه وغرامه
من لا يوده عن غرامه يشومي


ويصد عن درب الخطا والغشامه
يا سعود قم لعل حظك يقومي


وافزع وبشرني بوصل وسلامه

محمد الأحمد السديري

هاجوس قلبي

يا زبن ذقت الود حلوه ومره


وفي غفلة الحساد سندت واديه
مصادف يا زبن خيره وشره


ومجهول دربه باظلم الليل ماشيه
وان ناشني باسباب دربه مضره


ابرا إلى شميت معسول صافيه
وإلى استعر يا زبن بالقلب حره


القى غرير بالموده يطفيه
بحماه درك القلب يلقى المسره


يبري عناه ويخضرن به نواميه
انصاه لو انه بعيد مقره


قلبي بقلبه محكمات عراويه
طفل بسلك الود قلبي يجره


مطاوعه قلبي ولا هوب عاصيه
ماناش قلبي له من البغض ذره


واكن له ود على الناس مخفيه
هاجوس قلبي كل يوم يمره


ولو هو بعيد كن عيني تراعيه
زوله إلى شفته لقلبي مسره


وان غاب عيني تروعيله وتبكيه
ان غاب عني جا للاضلاع صره


والقلب مني يرتجف من محانيه
ترى الحياة ابلاه يا زبن مره


ولا ظني امه مثل ما اغليه تغليه
ما ريته فوق الحجاجين غره


كامل وصوف الله من الملح معطيه
ان غبت عنه وجيت قام يتشره


ما يدري ان القلب دايم يباريه
وحياة خلاق القمر والمجره


اني فلا انسا غالي مغرم فيه
يا زبن والله ما بقلبي مغره


ويا زبن ذقت الود مره وحاليه

محمد الأحمد السديري

والله مالوم القلب



اصوم واودع خيالك وذكراك


وافطر وكنك يا عشيري قبالي
عيا فوادي يا ريش العين ينساك


والبال ما هو عن مودتك سالي
والله مالوم القلب لو انه اغلاك


دايم خيالك ماثل في خيالي
لا ما هجرتك لا ولا يوم انساك


ولا احد من المخلوق غيرك زهالي
اضمرك ما طريك لعداي واعداك


واخفي ودادك يا بعد كل غالي
ما اجفاك لا والله ما جفاك


ما جفاك ماسج ما انسى غرتك يا حلالي
احب انا لاماك واكره لفرقاك


ويضحك زماني كان ودك صفا لي
إلى سمعت الناس تلهج بطرياك


يفز قلبي يا خلف من غدا لي
فرقاك تجعلني على حبل الادراك


ولاماك تحيي بي عروق هزالي
اموت من فرقاك واحيا بلاماك


وتغيب وان شفتك هواجيس بالي
يا غض يا مياس يا غض ما احلاك


ابتفيا وسط فيك ظلالي
ابي نعيمك عن هذولا وذولاك


وابيك تلطف يا حبيبي بحالي
بشفاك عل شفاي واضحك لدنياك


وضحكتك تجلا مظلمات الليالي
العام يوم الهجر بعد مطاياك


يوم الوداع اقفيت ياشن جرالي
ناديت باعلى الصوت ناديت باسماك


وبحب عليا وش جرى للهلالي

محمد الأحمد السديري

في جال مرجوع



يا زين مشي بين حمر الرمالي


وخضر الرياض اللي غذا نبتها السيل
أو جلسة فيها اشوفك قبالي


ما بيننا الا النار هي والمعاميل
في جال مرجوع من الطرش خالي


سقاه من نو الثريا مخاييل
تلقى الحباري خنس بالمفالي


والريم يدفعها الهوا للمقابيل
ومعنا من البيض الحدار الثقالي


صوارم في ضربها توفي الكيل
من شالها يصبح عن الهم سالي


لا لاحقه هم ولا سامع قيل
وان نوخو عند الحمول الجمالي


تلقى رجاجيل عطاش معاليل
ما هيب هرجات الضحا بالظلالي


وملاعب اللي يلبسن المناديل

محمد الأحمد السديري

محد يلومك



يا مير ياللي للسبايا نطيحي


ان صار للقحص المراهيم ميدان
ماجور يا راعي الثنا والمديحي


لاباس يا فرز الوغا ذرب الايمان
ان كان قلبك بالموده مشيحي


والله ما لومك يا سلايل كحيلان
الزين ماله يابو خالد نطيحي


كونه شنيع ولا يوصف بالاكوان
محد يلومك يبو وجه مليحي


اصبر وراعي الصبر يجزا بالاحسان
عادات طراد المها يستضيحي


والصيد له ملقاف والرمي نيشان
للي تبي لعل دربك سميحي


وما كاد يا شبل الضواري لكم هان
راع الهوا ما يستريح ويريحي


عاشق ومعشوق ورابح وخسران
كم واحد للبيض خلي ذبيحي


افطن لقصة قيس هو وابن عدوان
والبيض قبلك عذبن الوضيحي


وبن سبيل والدجيما واركان
أنشهد انك يابن فيصل صريحي


ناديت مشغوف على الحب شفقان
من عبرتك خليت دمعي يسيحي


واسقيت مغبر الثرى وهو عطشان
وهيجت قلب قام يلفح لفيحي


بين الضماير خافقه تقل بركان

محمد الأحمد السديري