بسم رحمن ٍ رحيم نعبده ونستعينه

بسم رحمن ٍ رحيم نعبده ونستعينه
بالنوايا نيته تبطل حقايق كل نيّة

بالربوبية وبالشان العظيم موحدينه
الرقيب المطلع فالبينات وفي الخفيّة

لا مفرٍ من قضاه ولا هروبٍ من يقينه
و لا حماية للحصون إلا حمايته القويّه

يا بنات الفكر هاتي لي نوادرك الثمينة
في نبا سلمان بن عبدالعزيز أمشي جريّه

في سنام طويق يزرع لك من الياقوت عينه
في زاد وفيه شرب وفيه كن وفيه فيّه

جودته تغني الفقارى وارجحٍ خطلاً يمينه
لطمته تعمي عداه ونفح جوده مسفطيّه

طول الله في بقاه ومدد الله في سنينه
الخصال الطيبه في شيخ أهل نجد العذّيه

شايل الحمل الثقيل ومعتق النفس الرهينه
بالدليل وطايع ربه ومتبع نبيه

يا ولد قايد مسيرتنا وربان السفينه
الزعيم الفيصلي مرسي الحدود الفيصليه

صبح المديون قبل الفجر ثم ارتد دينه
قمته ست الركايب وار بعين بوارديه

لا يغدر ولا يخون ولا يحقر محاربينه
يرفع البيرق على وضح النقا والشمس حيّه

بعد ما سيطر على الخزان واستولى الخزينه
صوتوا بالحكم بين مقيبره والناصريه

كانت اقلوب أهلها شتى وكلٍ له ضغينه
في جهل وأعمالهم سلب ونهب وعنصريه

جاته الأسياد تعطيه الولا ومبايعنيه
بعد شافوا ضرب أبو تركي ومركاض العبيّه

كان في الشبه أربعين وكان به عشره بطينه
فأشهد إن عبدالعزيز الفيصلي ما فيه زيّه

سيدي قدام أجيك القلب ما يظهر كنينه
أتلزا بالعزوم اليوم والصبح وقفيّه

وعندكم يا بو فهد تبدا الظواهر والبطينه
انتوا اللي بعد رب البيت منصى للشكيّه

سيدي ترك الحقوق اللازمه ما هيب زينه
خص عند اللي يقول حقٍ علي وحق ليّه

إن بغيت أصد لا الصده عن الماجوب شينه
و إن بغيت أجود شحّن المصاري من يديّه

في وجهك ووجه أبوك أو جاه مكه والمدينه
و جاه من صام رمضان وجاه من حج الضحيّه

من قيادٍ عند أخس الناس ورّانا الغبينه
و الدهر يا كثر قشرانه وياقل أجوديّه

يا صلاة الله على من دين أهل الاسلام دينه
و السلام ورحمة الله وبركاته والتحيّه



سعد بن جدلان