اللي وطى خالد بحبه مع شوق

لو خالد لحونه بها الحزن مرفوق
اطرب لها واعيش نشوة زماني
اتداعب اشعوري مع سكرة الشوق
واسرج على درب المحبه حصاني
واللي وطى خالد بحبه مع شوق
اشد منه في حياتي وطاني
حبن يسوق الروح للتهلكه سوق
وسرن حفظته بين عوج المحاني
سر المحبه مادرى عنه مخلوق
بموت مايعرفه حتى خواني
خلن غرامه سار في كل معلوق
لاطرو اسمه طيحتي في مكاني
تمرني ذكراه وارتاع واتوق
وليا ضميته شوق دمعي سقاني
عقدين مرت كلها عوق في عوق
والشيب يغزيني ولا زلت اعاني
وقلبي وسمه الحب بحروق وفتوق
لو كان ينبض راعي القلب فاني
‏وان شاروا بغيره غدى الصدر مخنوق
مارضى بداله ياهل الشور ثاني
اما اجمعو مابين عاشق ومعشوق
ولااتركوني والله المستعاني
يوسف الشمراني