ياللي تبي تعرف اسراري وعنواني

ياللي تبي تعرف اسراري وعنواني
الحزن والضيق واللوعه عناويني

وان كان من جد يا بن الناس تبغاني
في كل لمة حزن يمكن تلاقيني

يكتبني الضيق واللوعات تقراني
والناي من شرهة احزاني يغنيني

أجامل الصبر والايام تعصاني
بالله قلي وش اللي معجبك فيني

فقير يوم ان عز النفس ما غناني
كم قلت للفقر عز النفس مغنيني

كم واحدن ما شتمته لجل ما عطاني
وكم واحدن ما مدحته لجل يعطيني

يقلقني الذنب لامنه تغشاني
يالله من الذنب والغفله تنجيني

مافيه صوتن يخفف عني احزاني
الا ابن شريم لأأأأأم المصليني

ما هو بدايم يصير لساني حصاني
كم زلة(ن) من لساني صدق تشقيني

من صغر سني وانا هالحزن يبراني
واليوم عمري تعدنه ثلاثيني

صحيح ماني بمثل ابوي واخواني
رغم ان هقوات نفسي نوب تغويني

ما مد كفي لكفن ما تمناني
ولاسج رجلي بدربن ما يوديني

ما كذب لاكن اتجمل بعض الاحياني
يوم ان ها الكذب صاير شي روتيني

في ظروف ازرف عزيزن ما تناساني
وفي ظروف ادور مزرفني وناسيني

اعرف نبض الجفا في وجيه عدواني
واعرف نبض الغلا في اللي مواليني

والطعنه اللي تجي من صوب صدقاني
اقسى من الطعنه اللي من عدويني

كم مرتن مات دمعي داخل اجفاني
وكم مرتن اتفه الاسباب تبكيني

كذاب لو قلت شعري يوم ما شقاني
احيان يسرق منامي من جفن عيني

اكتب قصيدي عشان عيون خلاني
ومرات اجامل عشان ارضى محبيني

هذا اعترافي وانا ماني بندماني
ممكن ابصم او التوقيع يكفيني


الشاعر : على الريض العزيزي المطيري