ياملّ عينٍ يعـلّ الجيـب ذارفهـا

ياملّ عينٍ يعـلّ الجيـب ذارفهـا
اربع وعشرين ساعه تهجل اهجالي

والنوم يا دحيم عايفتـه وعايفهـا
دارت سنتها على سِهْـر وتملاّلـي

مدري على النوم عيني وش مكلّفها
للسِهْر في نونها ممسى ومقيالـي

واللي جعل نوم عيني ما يوالفهـا
واهج لهيب الغرام اللي برى حالي

واحالي اللي طهوم الشوق ناحفهـا
ماباقٍ الاّ عظـامٍ جسمهـا بالـي

عليك ياللي غلاك الـروح متلفهـا
ياللي محلّك بوسط القلـب نزّالـي

غلاك نفسي عن الخفرات صارفها
لو يجمعن لي من اولهن الى التالي

لك سيرةٍ بالمحبّه ما اقدر اخلفهـا
لو هي سبايب سهر عيني وغربالي

الاّ رجا ساعةٍ ما اقضي حسايفهـا
والاّ على السنّه السمحـا تهيّالـي

رجعت للسالفه واحييـت سالفهـا
اللي يقولونها في ماض الاجيالـي

اللي سبب موت ضيف جديع ماقفها
حيث ان ذبّاح ضيف جديع يبرى لي


عبدالله بن عون

مشاركة رائعه
شكرا على مجهودك الطيب
جزاك الله خيرا
ولك كل التقدير

المشاركة الأصلية كتبت بواسطة ريحانة شمران

مشاركة رائعه
شكرا على مجهودك الطيب
جزاك الله خيرا
ولك كل التقدير

الأخت الرائعه ريحانه شمران
اشكرك جزيل الشكر لتعقيبك المميز
كل الموده والتقدير لاعدمتك