علم الرسام لا يتعب يدينه

علم الرسام لا يتعب يدينه
وعلم المرسوم ماله فيه حاجه

طاح في موقف عسى ربي يعينه
وحاول ايخبي عن الناس انزعاجه

واحتقر رسماته وخبرة سنينه
وحال خوفه دون فالرسم اندماجه

رسمته للمستحيل اكبر غبينه
مثل من يصلح تكسّار الزجاجه

مستحيل يجيب خشمه .. كيف عينه
ابتلش عاده يبي يرسم حجاجه

وان رسم عقب التروي حاجبينه
كيف يضبط حاجبه عند انعواجه

وكيف ينحت بالقلم غمازتينه
ويرسم الماء في عيونه وارتجاجه

وكيف يضبط قذلته تمسح جبينه
ولون وجهه لانحرج عقب امتزاجه

ويوم جا المبسم بدت ترجف يدينه
وبان فالمرسوم ضحكه وانحراجه

علم الرسام لا يتعب يمينه
ولا يخسر من الورق والحبر حاجه

وعلم المرسوم مهما كان زينه
لو يلاقي صاحبي عكّر مزاجه



محمد بن فطيس المري