مرافئ الحنين

بسم الله الرحمن الرحيم

( مرافئ الحنين )



لو إن شعري مهو تحت الطلب كل حين
وأحيان يصعب على فكري وثورة دمي

صيدٍ عن أهل القنص يجفل يسار ويمين
وشجرة عظيمة لكنّ إنتاجها موسمي

إلا إني آسخـّره لجلك بسيفٍ سنين
من شان يوقف معي في الموقف العالمي

كلمه ويوصل لك المعنى ولا كلمتين
ورميه تصيب الهدف عن سيفي ومحزمي

مادام شفك تشوفين الكلام الثمين
تسلـّمي من جزال المعرفة وإسلمي

أنا الذي صنفه وقته من العاشقين
وندم عسى من صروف الوقت ما تندمي

قدمت يالغالية قلبي وما في اليدين
ورميت لكنّ عيا لا يصيب اسهمي

ياللأسف لاهي بمره ولا مرتين
عمر ٍ تعدى وعدى معْه حبر اقلمي

ولا بقى لي عذر عن مامضى من سنين
ولا جوابٍ يفك القيد عن معصمي

كرامتي لجلها قطعت عرق الوتين
لعلي آموت ما يشمت عليّ آدمي

يدعي لي الناس بالرحمه مع الميتين
ولا تزل اللسان ولا تزل اقدمي

وختامها عدّ من صلى من المسلمين
صلى الله وسلم على المصطفى الهاشمي



عبدالله علي الشمراني