ديوان شعراء السعودية في العصر الحديث (متجدد)☘️☘️

ماعاد تستاهل



كل حاجه طعمها مر فى هذا الزمان


هم هالدنيا وحنا نعيش لهمّها
المكان اللى عرفناه ماعاد المكان


والقلوب أحداث الايام زادت غمّها
صاحبى حتى أنت ماعاد تستاهل حنان


أنت بعثرت المشاوير وانت تلمّها
البكا فى مثل هالحال نوع من الهوان


والمهونه كل رجال حر يذمّها
صاحبى لو كان للناس والدنيا أمان


ماتموت ورود الاحلام قبل نشمّها
خل عنك علوم الاحباب واللى كان كان


انتهيت وسيرة الشوق مانى يمّها
كلما تظما لياليك قمت أكتب عشان


تنزف جروحى والايام تشرب دمّها
الكلام الموحش يخاف نور الشمعدان


تحترق أسمى معانيه قبل يضمّها
من زمان أكتب علشان نقرا من زمان


بس ماشفت المكاتيب جابت همّها

متعب التركي

جزاي وجزاك

انتهينا وصار اكبر خطاي الوفا
انتهينا وعند الله جزاي وجزاك

ادري ان الزعل حجه عشان الجفا
ادري وقلت ابسمعها من شفاك

تختفي وانت خابر جرحنا ماخفا
كلهم شايفين الجرح وانت بعماك

قلبي اللي صفالك ماللغيرك صفا
جاك من طيبه وعاف الهوى من رداك

القدم من طويل الدرب مل وحفا
والنظر طاح من دونك وسرب وراك
متعب التركي

ريحانة شمران
كل الشكرآ لك على هذا الجهد والتفاني
والطرح المفيد والمتنوع ايها المميزه
دمتي في احسن حال والله يرعاك
ويبارك فيك

تسلم مديري الغالي ومنور الصفحة

اطلالة رائعه ولاعدمنا حضورك المميز

متابعه

طاب السهر



يوم طاب السهر عيت تطيب النفوس


جت من الله وانا كم كنت محتاجها
كنها من حلاها كل ليله عروس


خايفه من عيون الناس واحراجها
حي هالطول يا زولٍ عساه محروس


من عبث لوعة الايام وازعاجها
تزعل نفوس ولا تمتلي غيض روس


من يقرب لها وضلوعي سياجها
لي متى وانت يا شوق القلوب محبوس


طالت السالفه وابطيت بعلاجها
جعل قلبن على نار الغياب محموس


يحترق بين صاليها ووهاجها
من خبر له غلا بين الضلوع مغروس


غرسةٍ كل ابو شعري من انتاجها
لا تقرب لك الفرقا هذيك الهجوس


من متى والبحور تفارق امواجها
لازم اصبر على وجه الزمان العبوس ..


لين سود الليالي يضحك احجاجها
من بغى يقطع الفرجه يعاف الجلوس


لين ياصل نهايتها ومخراجها
كان شعري قصر ما طال شمس الشموس


تستريح القصايد داخل ادراجها

متعب التركي

هب الهوآ



هب الهوى غرب واجتاح الضلوع وشعر


إن الليالي الجميلة هب نسناسها
مدري كبر حلمنا ولابعيني كبرت


والاهي اوهام ودي يصدق إحساسها
تنساني أيام وتجيني متى ماذكرت


اليامتى وانت روحي حابس انفاسها
كنت أجمل احلام عمري بس ليه انكسرت


يازين الاحلام لوماينكسرباسها
بيديك مديت لي كاس المحبه وصرت


أنا اول اللي يذوق المر من كاسها
من يومها وانت قدام عيني ولوماظهرت


دايم وعيني تشوفك بين جلاسها
قدرت ولا على نفسي معك ماقدرت


لازاد عنها غيابك زاد وسواسها
لوشفت حال الورق والشعرعقبك عذرت


اللي حرق صفحة الماضي وكراسها

متعب التركي

تحصيل حاصل



مليت امشي كلامك وين مقصودك


باوقفك ابسألك وتقول لي واصل
واصلت دربك ولكن ضاعت حدودك


واللي حصل لي ما اظن لحضرتك حاصل
تعطيني وعود لكن تبخل بجودك


بنيت دون الحقيقه حاجز وفاصل
مابي ملامك عتب وارفض عتب سودك


انته من العين مهما تفعله ناصل
كمل بروحك لنفسك نقصك وزودك


تاصل طريق تبي او عل ما تاصل
ولا يروح عقلك بعيد وتوفي وعودك


اللي بقا بيننا تحصيل حاصل

متعب التركي

خيل السروج



ليه وطيت عن خيل السروج


ليه مديت عقب القراح الهماج
لا تجمل لي الغلطات والعوج عوج


يضحك احجاج او ينعقد لي حجاج
اصبر اشوي وش علمك تهوج وتموج


ميت القلب مثلك مايعرف الهياج
ماتعودت اجامل معتلين البروج


الزم العلم قبل يصير هرجك سماج
المشاعر تحي مثل المعاصير هوج


ونت مالك على هوج الرياح احتجاج
جيت وقلوب حسادي تميل وتروج


لا صفى جوهم ساعه قفاه العجاح
ابتسم لك وهمي فوج يقفاه فوج


من يحبك لزوم ايصر مثلك هجاج
بس قلي ونا غلطان لك ومحجوج


وين يلقون لجروح النواعس علاج
القمر غاب وانت اطفيت نور السروج


قلت يكفيك نور الوجه الاصبح سراج
كن بين الضلوع العوج صفقات موج


يوم فاض الغلا والشوق والقلب هاج
ضيقة الصدر لو بين المحاني تلوج


كل ضيقة لها عند الكريم انفراج
ماهو الغيض سبت كل ابو هالهروج


بس مالي على بعض السوالف مزاج

متعب التركي

ربع تعريفه



لا يا علي الوضع هذا ما يناسبني


قله يفارق ترى لي بان تزييفه
يروح يبعد..وثم يرجع يقربني


يبيني اتبع هواه واخضع لكيفه
يخطي..ويزعل ويرجع لي يؤنبني


اسكت وانا اسمع تفاهاته وتخريفه
ماني بتمثال وقت الضيق ينصبني


عنه اتلقى خطا غيره وتهديفه
عذروبي اللي يعرفه ما يعيبني


كتاب مكشوف واضح فيه تحريفه
الموقف اللي حصل بالحيل متعبني


ولا يحاول بثوب الكذب تلحيفه
قله فراقه ترى ما عاد يرعبني


ما عاد يسوى بعينيربع تعريفه
انغام عزفه ترى ما عاد تطربني


عندي تساوى برود شتاه مع صيفه
ماني معاتب وقله لا يعاتبني


جوي تعكر ولا اطلب منه تلطيفه
نهر العطا جف قله لا يحاسبني


القلب مما علق به صعب تنظيفه

متعب التركي

الوطن



العلم رفرف على نجد وجبال السراه


مثل ما رفرف على كل ديره بالوطن
أن كتبنا للوطن صارت الريح الرواه


وأن تحدثنا حكايات وأشجان وشجن
للوطن تاريخ يدريبه اللي ما قراه


يوم جاب الله له اللي حماه من الفتن
الزعيم اللي وقف فيه وأذن للصلاه


جمَع أطرافه على الدين والشاهد زمن
جاه ابو تركي وصبحه مثل عتمة مساه


إنتهاك وفقر وأحزان ومحن
وحده في حد سيفه وطوع عصاه


من هنا للبحر الأحمر إلى حد اليمن
شع نور العدل من سيفه ونور سماه


لين صارت أصغر قراه مثل أجمل مدن
أمنه بالعدل والعدل هو نور الحياه


لين قامت مملكتنا وصارت دار امن
الوطن هذا نحبه وعشاق لثراه


الوطن هذا سكينه قبل يصبح سكن
في نهار السلم نبنيه ونعلي بناه


وأن لمحنا خاطره ضاق قلنا له تمن
وش تبي ياموطن العزمن سمر الجباه


وش تبي أكثر من الروح ورضاك الثمن
الوطن هذا لنا حق نفخر في غلاه


يكفي انه لشرف الخلق واتباعه وطن

متعب التركي

فهد المساعد

- ولد الشاعر في الرياض وعاش فيها ما يقارب أربع سنوات من طفولته قبل أن ينتقل إلى مركز الرمحية التابع لمحافظة رماح في منطقة الرياض،
- في الرمحية درس مراحل التعليم العام
- ثم انتقل بعدها للعيش في مدينة الرياض
- بدأ نشر إنتاجه الشعري عام 1999م في مجلة (فروسية وشعر)، ثم استمر في النشر في عدد من المجلات الشعرية المعروفة أبرزها: مجلة (فواصل).
- وتميّز في السنوات الأخيرة بقصائده الغنائية التي حققت نجاحات كبيرة مع العديد من المطربين من أبرزها قصيدة (لو يوم أحد) التي غنّاها الفنان عبد المجيد عبد الله.
- كانت للمساعد تجربة قصيرة في العمل الصحفي من خلال إشرافه على ملف الشعر في مجلة (فواصل) عام 2008.
- كُلّف بكتابة أوبريت مهرجان الجنادرية
- دواوين مطبوعة:
(سالفة عشاق). صدر عام 1428هـ - 2007م.
(وشم) يوميات الشاعر فهد المساعد. صدر عام 1430هـ.
(عمري الجاي). صدر عام 1432هـ.
(ما علّمك صوت المطر؟!). صدر عام 2014م.
- دواوين صوتية
ألبوم (المدينة والغريب).
ألبوم (الأسرار).
ألبوم (الذكريات).





سحابه(قصيدة)



جف الكلام ومدت يدينها فوق: ..


.. أخترت هذي .. وأنت شف لك سحابه
قلت .. ويديني تحتضنها مثل طوق ..


:أخترت هذي هذي أكثر رحابه
هذي دفا صوتٍ من البرد مخنوق


هذي سؤالٍ نصف عمري جوابه
هذي هي اللي عرّفتني على الشوق


هذي قدر .. ماكنت حاسب حسابه
قطعة حزن في جيب بالي ومشقوق


ومضة فرح في عيون ناسٍ غلابه
أن سولفت في ثغرها لمعة بروق


وإن سرّحت في عيونها صمت غابه
واليا اضحكت نورٍ من الفجر مسروق


واليا بكت تحزن عليها الكآبه
حبي لها لوأدري ان فيه مخلوق


قدّ حبّ مثله .. قلت: ياللغرابه
هالآدمي من وين له قلب وعروق؟!


والصبر هالمسكين من وين جابه؟
وأنا أتكلّم .. ردّت عيونها فوق


ثم تمتمت: من هي هالأكثر رحابه؟؟
قلت ويديني تحتضنها مثل طوق


في ذمتي ماشفت غيرك سحابه

فهد المساعد