رد: ديوان الأمير بدر بن عبدالمحسن
 

انا احبك مابها زيف وخداع
رغم الذي نخفيه .. واللي نخافه

أودعك .. ليت الألم لحظة اوداع
إلى مضت .. ننسى الألم والحسافه

وأفارقك.. لوالسفر .. يم وشراع
وبعد الفراق .. اللي نوده نعافه

لا صار مافي البعد راحه لملتاع
بالله وش نفع التعب والكلافه

من الجفا والصد .. يكفيني اذراع
لا جف نهر الحبماتت اضفافه

املي يدك رمل وترى هذي القاع
ومدي النظر .. تدرين وش هي المسافه

البدر

رد: ديوان الأمير بدر بن عبدالمحسن
 

قام الفهد .. فهد العرب ..
قال الكويت ترجع لنا .. لو ما رضيت ترجع لنا ..
ضاق الفضاء .. باللي حرب.. ذاق الهزيمة .. وانسحب ..
قام الفهد .. فهد العرب ..
قال الخليج .. ارضٍ لنا ..اهل الخليج .. هم اهلنا ..
ضاق الفضا باللي حرب .. ذاق الهزيمة .. وانسحب

البدر

رد: ديوان الأمير بدر بن عبدالمحسن
 

تشرق الشمس .. من جروح الامس .. من دموع الامس
ينتهي الليل الطويل .. يرجع الظالم ذليل
انتصرنا بقوة الله .. ربنا الفرد الصمد
انتصرنا .. بقدرة الله ثم بإيمانك فهد
وانتهى الليل الطويل وهذي الشمس

البدر

رد: ديوان الأمير بدر بن عبدالمحسن
 

ياليت ابو تركي يشوف .. فـ الحرب كيف افعالنا
الشيخ ورث لها سيوف .. ونعمٍ بكل ابطالنا
للحمل اركينا الكتوف .. لو هي ثقيلة أحمالنا
حنا على الصاحب نروف .. وقبر العدو برمالنا

البدر

رد: ديوان الأمير بدر بن عبدالمحسن
 

يا رافع الجبهه .. جعل الردي يفداك ..
لا ما على الجبهه .. ما دامها في حماك ..
انت يالجندي السعودي .. صخرةٍ تحمي حدودي
وللبطل اهدي ورودي .. والقهر لعداك
سيفنا وقت الحرايب .. درعنا لا جا السلام
عزنا هذي الكتايب .. نورنا وسط الظلام
انتم احفاد الصحابة .. وانتم جنود الامام
كلكم عزم وصلابة .. دون هالبيت الحرام

البدر

رد: ديوان الأمير بدر بن عبدالمحسن
 

ما لاحد منه الله اللي عزنا ..
روحنا كتاب الله وقلبنا السنه ..
وان طمع فينا العدو ما عليه منه ..
ابشري يادار نا .. السعد فالك
وافرحي ياارنا .. بوقفة رجالك ..
انت بين ضلوعنا رملك جبالك ..
من ظهر فـ أرض العرب واعلن جهاد ..
من توحد قبلنا وحرر بلاده
من بنى هذا الوطن .. حنا يا ساده ..

البدر

رد: ديوان الأمير بدر بن عبدالمحسن
 

ليلٍ على الخفجي تشقق نهاره
في عيوننا صبحٍ وفي عيوننا ليل
الله على مبتدينا بغاره ..
هو ما درى اننا للملاقى مغاليل
جوكم هل التوحيد وهل الجساره
وجوك النشاما .. صدق .. ما هي تهاويل
ومن الحرس والجيش .. ذقتوا المراره ..
خلوا جنايزكم .. جدوعٍ بعد سيل ..
يا طالبين الحرب .. ما هي عياره ..
دارٍ الى شبت حطبها .. رجاجيل ..
حنا عمار الخصم .. وحنا دماره ..
وحنا الى ضاقت .. نحل المشاكيل ..
بارك الله غرسنا .. ربنا المعبود ..
يظهر الله شمسنا .. في الليالي السود ..
والمعارك عرسنا .. وعطرنا البارود ..
يالعدو مالك طريق .. والله ترابي حريق ..
والاخو والا الصديق .. ما يخون عهود ..
ارضنا ارض الوفا .. هو جزا الطيب الجفا ..
ياعدو والله كفا .. لكل صبر حدود

البدر

رد: ديوان الأمير بدر بن عبدالمحسن
 

خضار البحر في عينك
وملح البحر في اهدابي

وعيا البحر لا يسكن
أبد في صفحة كتابي

قصيده من خضار وملح
يا أول وأخر احبابي

انا من شفتها عيونك
ترى ما جفت ثيابي

ولو آخر قصيدي بيت
كتبته حب في عيونك

ولو يحمل همومي بيت
سكنت البحر وعيونك

ويبقى البحر وعيونك
وينشف في قصيدي البحر

ويبقى العشب وعيونك
ويزهر في متون الصخر

ويبقى الحب وعيونك
رغم كل الصحاري نهر

وانا والجرح والفرقا
وهذا الحزن بسبابي

ولو ادري البكا له بيت
اسوق فْـ دربه ركابي

ابي لا غابت عيونك
ابل بدمعي ثيابي

البدر

رد: ديوان الأمير بدر بن عبدالمحسن
 

دايم يذكرني النخيل
غير الطفولة والرياض
وصوت السواقي والهديل
مواجع الضي النحيل
على وجنتك
كان الظلام والله كثير
وما ادري وش اللي وهقه
واختار خدك فـ الأخير
وشعاع خدك شققه
دايم يذكرني النخيل
غير الطفولة والرياض
وصوت السواقي والهديل
مواجع الضي النحيل
على وجنتك
نجدية الضي والعتم
ما بين راسك والقدم
لي مجد لي مي ورطب
وسنابل الياس والغضب
ولي مواعيد النخيل اللي مضت
وحكاية الضي النحيل مع وجنتك

البدر

رد: ديوان الأمير بدر بن عبدالمحسن
 

لين العود قلبك ما يلين
قاسيٍ ما درى عن لين قدك

ما درى عن عذاب العاشقين
يا قمر والقمر غصبٍ يبين

انجز الوعد لو ما هوب ودك
كان ما هوب لي للساهرين

لاتخاف السما بينك وبين
عاشقٍ ساريٍ في نور خدّك

لاغدى لليل مجروح وحزين
ظالمي في الهوى الله يعين

ما ظلمني لطيف الروح صدك
ظالمي في الهوى شوق وحنين

لين العود لابد السنين
تبعدك يوم عني أو تردك
لنت يا صاحبي أو ما تلين

البدر