أبيات أصبحت مضرب للأمثال
 

أبيات قديمة
أصبحت مضرب للأمثال
وخلدها المؤرخون لجمالها
وقوتها الشعريه رغم قصرها :-



🔴 الأمير / عبيد العلي الرشيد :
ربعي لقوا بي عقب شيبي عذاريب
قالوا على ساقة خويه يحامي

قلت إن هذا من قديم بنا عيب
مستارثينه من خوال و عمامي


🔴 عبد الله الرشيد :
مايستشك يا حسين كود الرديين
و إلا ترى الطيب وسيع بطانه


🔴عبيد الرشيد :
اضرب على الكايد إليا صرت بحلان
عند الولي وصل الرشا و انقطاعه


🔴 طلال الرشيد :
لو حسب للسوس زراع القصب
ما زرعنا ي العصافير الشعير


🔴الجرباء :
الحر لا صكت عليه المغاليب
مجبور عن دار المذله ينزي


🔴 مفضي الشمري :
الطيب لو هو من أبعد الناس ينفعك
يصير لك عند اللوازم سنادي

و إلا الردي لو هو من الأدنين يقطعك
يعل وجهه للفنا و السوادي


🔴 الأمير محمد بن سعود :
الزين ما يدقم شباة السناني
و الشين ما يقصر يدين يطولن

إليا اجتمع زين و فعل اليماني
لذة نعيم فالعمر لا توافن


🔴محمد الأحمد السديري :
يا عل قصر ما يجي له ظلالي
ينهد من عالي مبانيه للساس


🔴محمد الأحمد السديري :
ليا خاب ظنك بالرفيق الموالي
ما لك مشاريه على نايد الناس


🔴مسلط شعيفان ابو اثنين:
قالوا هبيل وجايزلي هبالي
اهبال طيب ولا صحاوة رخامه.!


🔴زامل الحميدي السبيعي:
الصبر مفتاح الفرج خابرينه
لكن مفتاح الصبر وين نلقاه.!!


🔴راكان بن حثلين :
ما قل دل و زبدة الهرج نيشان
و الهرج يكفي صامله عن كثيره


🔴راكان بن حثلين :
يا ما حلا الفنجال مع سيحة البال
في مجلس ما به نفوس ثقيله


🔴تركي بن حميد :
واخير منها ركعتينن بالاسحار
لا طاب نوم اللي حياته خساره


🔴ابن سجوان :
يمنى بلا يسرى تراها ضعيفه
و رجل بلا ربع على الغبن صبار


🔴خضير الصعيليك :
الله يعدلها عن الضلع و الميل
و إلا يميلها على الناس مره


🔴 عبد الله اللويحان :
الحنظله لو هي على شاطي النيل
زادت مرارتها القديمة مراره


🔴محمد المنصور :
خوينا ما نصلبه بالمصاليب
و لا يشتكي منا الجفا و العزاري


🔴مريبد العدواني :
النوم ساس اللوم بان الردى به
و اللي يبي الطولات نومه شلافيح


🔴شالح بن هدلان :
من حل دار الناس حلوا دياره
لا بد ما تسكن دياره و يغبن


🔴البحر :
اشهدشهادة حق مدح الردي عيب
مثل الصلاة اللي على غير قبله


🔴 جديع بن هذال :
ترى لذة الدنيا معاميل و فراش
و صينية يركض بها العبد مسعود


🔴 بركات الشريف :
رافق أصيل فى زمانك يشاكيك
لا شاف خملاتك عن الناس غطاك


🔴محمد بن هادي بن قرمله :
الرزق عند الله والحظ توفيق
والعمر يفنى والليالي تدومي


🔴بركات الشريف :
م أخطاك ما صابك و لو كان ناصيك
و اللي مصيبك لو تتقيت ما أخطاك


🔴خضير الصعيليك :
أحد عشاه البر و مفطح الحيل
و أحد عصيده يلعط الكبد حره


🔴 مقحم النجدي :
أحد على جاره بختري و نوار
و أحد على جاره صفاة محيفه

الجار لا بده مقفي عن الجار
و كل بجيرانه يعد الوصيفه


🔴 نديم المجره :
قولوا لرعيان الغنم ﻻينامون
اشوف بالمرعى مواطي ذيابه

رد: أبيات أصبحت مضرب للأمثال
 

رد: أبيات أصبحت مضرب للأمثال
 

وهلا وغلا بالاخت الغاليه
شمرانيه الروح
شرفتي متصفحي بتعقيبك الرائع
أشكرك مع أجمل تحيه وتقدير لاعدمتك

رد: أبيات أصبحت مضرب للأمثال
 

رد: أبيات أصبحت مضرب للأمثال
 

رد: أبيات أصبحت مضرب للأمثال
 

وإياك أخي الغالي
ابو طلال
منور اشكرك
مع أجمل تحيه وتقدير لاعدمتك

رد: أبيات أصبحت مضرب للأمثال
 

وإياك أخي الغالي
ليث محمد
شكرا لك مع أجمل تحيه وتقدير لاعدمتك

رد: أبيات أصبحت مضرب للأمثال
 

رد: أبيات أصبحت مضرب للأمثال
 

اهلين وسهلين بالغاليه
ريحانة شمران
منوره ...
لك مني أجمل التحايا واطيبها لاعدمتك

رد: أبيات أصبحت مضرب للأمثال