طــال الـزمـان


طال الزمان وطال بعد المسافات
والبارحه بالحلم صدفه رأيتك
شفتك حزينه واقفه في ممرات
حي الطفوله حول جدران بيتك
وشفت الزمن راسم بخدك علامات
سهيت في مضمونها ثم رثيتك
قلت العنا داخل بقاياك يقتات
ليتك على نفسك تروفين ليتك
أذكر شموخ وطرف ناعس وضحكات
وش بدل الأحوال قولي رجيتك
قالت، ولكن تخنق الصوت عبرات
قلت اسمحي، للصمت لحظه دعيتك
حتى أنا جتني من الوقت غارات
ولو الوصل له درب مشروع جيتك
قالت كأن الوجد والشوق ما مات
ولا انت خادعني بكلمة نصيتك
قلت اسمعي، ما اخدعك انا عندي اثبات
والشاهد الله بالصراحه نويتك
لكن حسافه انهت الحلم رنات
صوت المنبه ليتني ما لقيتك
لانك لمستي جرح يعنيك بالذات
والمشكله سر الغلا ما عطيتك
عايض الميلبي
https://pimpilla.files.wordpress.com...to17.gif?w=450