منتديات قبائل شمران الرسمية - قصيدة من شاعر عامري شمراني

وجدت هذه القصيدة في أحدى المنتديات
وبودي أن أعرف أسم الشاعر
أبراهيم العامري الشمراني كاملا ً
...........

يارب تغفر لي وتصلح شاني
وأنك تقويني على عدواني

وتقر عيني بالهدى والتقوى
واجعل عباداتي تزيد ايماني

وتمدني بالعمر لأجل اطيعك
في كل امر ٍ يقتضي الاحساني

يارب مالي غير وجهك ملجا
ماني من اللي يتبع الاوثاني

عبدك وازيدك حمد يا سبحانك
سبحان خلاّق البشر والجاني

خلقتنا من طين وادري ايضا
الطين هذا مرجع الانساني

من طين لكن الطبايع تفرق
كل ٍ وطبعه في رحى الميداني

رجل ٍ قليل العرف عقله سارح
ومن شين حظه .. جاهل وشراني

يزاحم أهل الشور وليته يفلح
مغرور ما يقنع يكون الثاني

( رب أمرء ٍ يعرف مزايا نفسه
وأن الحماقه تخلف الميزاني )

ورجل ٍ طموح ونظرته للعالي
صغير سن ويرهق الشيباني

يازين منطوقه وما أحلا هرجه
لامن حكا يسمع له السلطاني

هذاك مثله ما يبدّل شوره
وتشوف من خالف حكاه يهاني

ورجـّال من بخله تقطّع ثوبه
ياجعل مال البخل في نقصاني

الحزن كنـّه في كلام عياله
يعزف موسيقى صاغها الرحباني

يجمع ويحرم نفسه من النعمه
ويموت .. ما كان بحياته هاني

ورجل ٍ يدور للعشا ما يلقى
فقير عاش بهالزمان الجاني

وساعة يشوف الضيف يهنا باله
يفرش له الديوان فرش ايراني

لو يرهن عيونه .. يسوق الواجب
من دون وجهه ينحر القعداني

يارب والخاطر تعكّر صفوه
والبال ضايق والحزن ينصاني

من حاجة ٍ اشوفها واعرفها
واخلف خطاها وليتها تجفاني

قامت تعارك في الخفوق وتسبي
اجمل سنيني واعذب الازماني

الزله اللي من رفيقي تجرح
تبقى على مر الدهر عنواني

عديتها متعمد ٍ لـكنـّي
من وين اعدّي دامها تبغاني

الدهر يحفظ للجمايل ذكرى
= والذكر باقي وانت عمرك فاني

قدّم جزال الفعل تلقى تالي
لاشان حظ الغير ..حظك زاني

ولا تبتسم لي وانت قلبك شايل
وساعة اقفي بالحكي تبلاني

تجهل وانا باعلمك يا جاهل
محسوبك ابـراهـيم الشمراني

من لابة ٍ افخر بها واعلّي
شمران ربعي مكرمين العاني

تهم وسراه وحدنا في بيشه
صيت ٍ يجي للقاصي و للداني

الصوت في ( باشوت ) يرعب دوله
من قرن ابن ساهر لأبن حوفاني

و( السبت ) درع ٍ في الليالي العسره
يحمي سهول ٍ خيرها منصاني

وان جيت لـ ( ال الحارثيه ) وقّـّف
وسط ( البشاير ) مقعد الشجعاني

ولا جيت ( ابن شايع ) فسلّم واقلط
عند ( آل عامر ) تسعد الضيفاني

و( شقيق ) سيف ٍ يقطع ايد السابي
واهل ( الفزع ) حماية الحداني

وصلب ( العوامر ) صلب فخر وعزه
وتلقى بـ ( قنونه ) علـّـية السلطاني

بقعاء إلا من غطرفت واصطاحت
ياتي لصوت الجبخان الحاني

ومن لا معه بندق يدبر عمره
خضر النوافع تنحر السمحاني

ومن زم روحه مشفق ٍ للعيشه
يا جعل روحه بالهلاك تعاني

يا سامعي وافطن هروج الشاعر
ماني بأحقـّر قيمة الصدقاني

في كل ديره مجد .. تذكر وقعه
ومن لا مدح ربعه ضعيف و داني

ومن زوّر التاريخ جعله يتلف
للسيف غمد وللرجال اوطاني

تمت بحمد الله وبتفضيله
ودي اقول الحين ( صح لساني )

بس البلا من قول ( مادح عمره)
وينشب بحلقي واحد ٍ يغثاني

بأختم بذكر العالي المتكبر
يارب بين الناس ترفع شاني