المشاركة الأصلية كتبت بواسطة ابراهيم طهيفان الشمراني (المشاركة 33174)

اسعد الله مساء الجميع بالخير والبركة



قصيده قديمة من الارشيف كتبتها قبل مايقارب 9 سنوات وطلبها ابن عمي واخي بن طهيفان وحقيقة القصيده كتبتها في وقت كنت عند ابو محمد في البيت وحدث امر معين اثارني على الكتابة فخرجت هذه الابيات

[center"]


يا آالهي يا عظيم الشـان يـا رب الوجـود
يا عليمٍ بالسراير يـا غفـور ويـا رحـوم

دلّنـي درب الهدايـه درب جنـات الخلـود
وأعصم لساني عن هروج الزلايب والرخوم

ان بغى الشيطان يغوي أرمي عيونـه بعـود
وان بغت نفسي تمادى زمتها حتـى تـروم

المعارف قدحها عندي مثـل قـدح الفـرود
والعزوم اليا رقت فيني تحس انهـا عـزوم

يا سلام الله على شيخ ٍ يسمونه سعود
وافي القاله وشيخ وقرم من نسل القروم

صلب لابه مزبن الضيفان جود ٍ فوق جود
السيوف اللي تنثر ما حداها من سهوم

صاحبي والنقص نقص وتدري ان الزود زود
والجبل يبقى جبل لو هبّـت ريـاح السمـوم

صاحبي والبحر جاله مـا يحـدده الحـدود
مد عينك وان قدرت تعـوم بالله قـوّم عـوم

المحاقر لـو تبعناهـا وحضّرنـا الشهـود
كان زم السيل موجه وارتقى فـوق العقـوم

زلة المطلق على المطلق مثل كسـر الحيـود
وزلة الهين على الهيـن تراهـا كـل يـوم

ولا غدى عز الفتى في عصرنا فعل الجـدود
والله ان عزي بربعي قوم عن مليـون قـوم

حن شمارين العناصي حن نماره حن فهـود
حن مروضة الصعاب وحن عريبين السلـوم

حن بروقٍ في السما واليا رعدت حنا رعـود
حن مداهيل الشكاله حـن مكسـرة الخشـوم

بدّنـا يـوم الملاقـا فاقتـه عشـرة بـدود
وانشدو عنا حصونٍ روسهـا باقـي تحـوم

من خصمنا يمسي بـ غبنه تحت قبر ولحود
ومن نصانا يبشر بعزه وعز الله يدوم

قلتها وانا اتعجـب مـن زمانـك يالجحـود
يوم صار البوم صقر ويوم صار الصقر بوم

قلتها يوم الخواطر شابهـا بعـض البـرود
واختلط في جوّنا هـاك السحايـب والغيـوم

يا سعود وجعل حظـك دايـمٍ يبقـى سعـود
عيشةٍ تحـت السعـه لا لا تلـوم ولا ألـوم


وسلامتكم

[/CENTER]