يالله طلبتك ياعظيم .. الرجا فيك = يا عالم ن بالخافيه والظهيره
وبسمك بديت القاف من دون تشكيك = في وسط شعّارن تحبك المسيره
لا شك في ناسن لها العرف تمسيك = مسك النداوي للرخايم شهيره
البارحه نفسي يجيها تحاريك = واقول في نفسي عساها ستيره
من يوم شفت السبع نفسه تهاليك = في تالي المجلاس عينه سهيره
وانذال قومه حاشمتها المداليك = القرش عزّه عقب ما باع كيره
قمت اتقلب فوق جمرن مساليك = كني قريص شب قلبي حريره
والنوم ما جاني على عادته شيك = ما غير اقلبها تجي سيل حيره
وش ذا الزمان المر وش جابني فيك = من يوم للحصني قبايل وديره
في الشارع اصحاب الجنوز اصبحت ذيك = لا صان معروفه ولاصان جيره
في مشيته ما كنّه الا زهى ديك = بالبزّه الحمرى عيونه قريره
وان جيت للخافي فلافيه تبريك = مثل النطيخه ما توفي ضريره
ماشوا عدوين النبي والمشاريك = في قصته في لبسته عاب غيره
وان جيت ناصحته فلاهوب شاريك = ما جابلك طاري وعينه كبيره
بالعولمه نادى وللدين ناهيك = ومحلقن شاربه وسط الظهيره
يالله تعز الدين وتعز ناجيك = وتعز راعين الشيم والعسيره
وتعزنا بالدين وسط التهاليك = يوم الحرار اليوم باتت سهيره