منتديات قبائل شمران الرسمية

ياكيف نسمع بالصلاح ولا لمحت اهل الصلاح
وياكيف نسمع بالعدول ولا لمحت اهل العدول

الله واكبر يازمن ماشفت في الوقت انشراح
يهيم بالي بانسجاماته ويسرح في ذهول

الله واكبر كيف تغدرني قوانيص الرماح
الطعنتين المزمنه باقي ألمها مايزول

يزيد ألمها كل ما هبّت من الغربي رياح
كنْها توقّد داخلي جمر الغضا في كل حول

كيف الحيا قد شد من بعض الحيا والحظ طاح
كيف الخيانة والغدِر تصبح الاعيب العقول

كيف الكرم والطيب والمرجلة عند الشحاح
تزهى بها عند الاكارم بين طقاق الطبول

ياليت لي عين الصقر ياليت بيديني جناح
واشد من دار الشقا وارف جنحاني واجول

والمح خطاوين العدو واعرف دهاليز النجاح
واهد هدات الحرار اعرف مواعيد النزول

واشيب عيني من شرور الناس والكذب المباح
تكذب هنا تغرس هنا بذر الفتن شر الفعول

اهل النميمةوالنفاق الغدر بيديها سلاح
ياكثر ماهي رابحه بازوارها في كل قول

الشر هذا منزله والخير في جد الكفاح
لكن مغلوبن على امرة وفي وقت الوصول

الشر يسبق خيرنا حتى ولو كان اجتياح
او اجتهاد الناقلين اللي على الكذبة تعول

اللي بواطنها حسد وغرور مافيهم صلاح
هذا قصيدي قاصده يرقب خطوات النذول

ما تظهر الا الطيب والحب و وجيه الملاح
اما الخوافي تذهلك بالغل والحقد المهول

واجهتهم يوم اضحكولي ضحك اشبه بالنباح
يدرون بانني كاشف الموال حبله مايطول

ضحكاتهم كانت غضب واشكالهم كانت قباح
وانا معاهم طايحن كرتي ولاعندي قبول

ثم اختفت اصواتهم وثالث الطعنات لاح
وامسيت مغدورن ولا عندي على الردات حول

وقمت اداري واطلب الرحمن نسيان الجراح
ياثالث الطعنات ماعاد نقوى للحمول

ماعاد نقوى عالمجامل وين هي شمس الصباح
شمس(ن) لها نور الفضا تشرق ونعرف كل زول

يالله يارب البرى يالله تكفينا النطاح
ياخالق الاهوال فحفظ حالنا من كل هول

آخر قصيدي لا يغررك في البشر كثر النياح
ياما تنوح الحزن والفرحات داخلها تصول