منتديات قبائل شمران الرسمية

على ماشفت في الدنيا ماشفت أعجب من الإنسان
مايدري ان العمر يومين والدنيا مهـي يوميـن

خلقها الله على بطئ وتأنـي وخلقـه عجـلان
يحسب انه يبي يبقى عليهـا ليـن يـوم الديـن

وهي خيطين:خيط من سراب وخيط من دخـان
ولايلحق مداها لو معه غيـر العمـر عمريـن

تموج بغيها والظفـر منجـا والكريـم معـان
والاحمق لاعطي رزقه كلـه بيدينـه الثنتيـن

صديقي كن بما حاشت يدك من خيرها قنعـان
ولاتنسيك حفظ القرش الابيض للنهـار الشين

طليق في فضاها وانت من بين اربعة جـدران
ليا صكت عليك الباب من بـرا تـروح منيـن

تبي تاكل من عظامك وياكل سورها الشيطـان
وتقلع جمجمة راسك وتزرعها علـى رمحيـن

اخذ من صبرك لنفسك عن اهواها رسن وعنان
واقف في وجهها كنك تخيرها مابيـن امريـن

تجدد واحذف الماضي وراك ورزنم الازمـان
وفكر كيف تبدأ مرحلـة بعديـن مـن ذالحيـن

تجد في داخلك زود تغطي به علـى النقصـان
ترا لو زان وجه الادمي ماهـوب كلـه زيـن

يزينه الحيا لان الحيـا شعبـه مـن الايمـان
وتطفيه المعاصي والذنـوب ورفقـة الغاويـن

فقيرينقل الكبـر وملـك كـاذب واشيمـط زان
ثلاثه مايعايـن يمهـم ربـي بطرفـة عيـن

عيال ادم خليط من الشيم والقبـح مهمـا كـان
تحاسنها وتبدو لك بوجه وهـي لهـا وجهيـن

لو بوسعك تقوم برحلـة استكشـاف واستبيـان
وتحصي من على الدنيا من الحييـن والفانييـن

لقيت نفوس من فيها حصاة في حـدا الغـدران
ولاتلقى حصاة فوقها المـا الاتحتهـا الطيـن

ليا من خلقت انسـان مايمنـع تمـوت انسـان
على اقل اعتبار يكون لك ميزه عـن الباقييـن

اشر الخلق خلـق موتهـم ووجودهـم سيـان
واخير الخلق خلق في مقابرهـم وهـم حييـن

الشاعر .. مدغم ابو شيبه