منتديات قبائل شمران الرسمية - قال الشاعر: عبدالله بن زويبن الحربي

يالله ياللي عـروق العشـب تنعشهـا
عقب الضما بالمطر من غيثك الناشي

يـارازق النـاس ياساتـر فواحشهـا
يامحيي المدركيـن اللـي بالانعاشـي

تفرج لنفس قـزت والهـم ينجشهـا
نجشة لسـان اللهب لـدلال هتاشـي

صفرٍ على الجمر والصالـي يغوشهـا
وقودها السمر ماهو رمث وقشاشـي

الهـم والضيـق والتفكيـر طفشهـا
ولاعاد به صبر كل الصبـر متلاشـي

الهـم لـه وقـت نيبانـه تناهشهـا
ربَع بها ليـن عرمشهـا تعرماشـي

لاشك مادام نفسـي فـي حشايشهـا
ماعاد أنـا مجـلٍ للفـرم مطراشـي

ابنحر اللـي زلـول ايـران يفرشهـا
وغزايز الحيل يكنفها علـى الحاشـي

شيـخ يسـد اللـوازم مايطنشـهـا
الليا عطاها قفـاه العفـن واللاشـي

كل المراجل ولـد محسـن محوشهـا
يوم أن بعض الشيوخ حيام وعطاشي

صيتـه فخـر للقبيلـة مايعبشـهـا
تفخر بذكرة من الخفجي الليا الطاشي

وعند الحكومـة قضاياهـم يناقشهـا
حميـة منـه لامرشـي ولا راشــي

نفسه مرد الثنـا والطيـب يدهشهـا
وصحيح من قال راع الطيب شواشـي

يدين الاعـداء ليـا طالـت يكلبشهـا
ليَـن لربعـه وبالعـدوان بطـاشـي

أنتـه حويـت المراجـل ماتنوشهـا
وابوك بالطيب قبلـك مالـه معاشـي

الليا اعتزا والمعارك طـاش طايشهـا
ماعاد ياقـف بوجهـه كـل هواشـي

الخيل تجفـل الليـا منـه تنهمشهـا
تقفي واهلها يجيهم ذعـر وخراشـي

القهـر بقلوبهـا والهـم ناحشـهـا
واللي قعـد عنـه ماللعلـم نباشـي

شرايـد القـوم ماتدفـن ولايشـهـا
منها سباع الخـلا والطيـر يعتاشـي

لو هي بعصر مضى كنـي معايشهـا
حقايـق ماعليهـا غيـم وغطاشـي

بالشعر من صفحة التاريـخ أهمشهـا
والصدق مابه جدال ونفـي ونقاشـي

بيوت شعر على القرطـاس أنقشهـا
منقوشة مثل نقش الزري بالشاشـي

ماهي همايا من الصفحـات لاطشهـا
ولا سقت فيها ثمن . . دينه ولا كاشي

نفسي عن الشعر اجوعها واعطشهـا
ماداني اللولشـه مـع كـل لولاشـي

الا اليا شفـت بـه شـي يحمشهـا
اطفيت نيران قلبي من مطـر جاشـي

يامير جتك العلـوم وجـاك طارشهـا
وابعطيك اياها على الطاير وانـا ماشـي

ذكرت بعض الامور وقمـت افتشهـا
وكثرت علي الهموم وجيت منحاشـي

مـن كـل جانـب مفتحـة درايشهـا
ابنسف الحمل فوقك وافرش فراشـي