منتديات قبائل شمران الرسمية - ابو راكان وابو ماجد

ابو راكان وابو ماجد

سر ياقلم واكتب جزيل الفرايد
واختار دراس الحكم والجدايد

وانصابها شيخٍ حكيمٍ وشاعر
من صلب قيفٍ يحتمون العوايد

سلام تسليم الوفا والمحبة
ياشاعرٍ في نظم الاشعار رايد

شاعر ومتمكن وشيخٍ معرب
ومطوعٍ عصم البيوت الشرايد

يغوص غبات البحور الغزيرة
ويحوش منها نادرات الفوايد

زهير بوماجد ظهوره يجمل
وتأكيد قولي مايبي له وكايد

سليل شيخٍ نفتخر في فعوله
زيزوم ربعه في المواقف وقايد

ابطأ علينا ماسمعنا جديده
ومن اولٍ يبدع جزيل القصايد

عساه سالم من صدوف الليالي
ولا لحقه من الشدائد شدائد

اطرب لقوله واتغنى بشعره
كنه على ماقيل للعرف صايد

يصيد من جزل المعاني سمينه
ويجنّب اهزال القوافي بعايد

طوّل في اغيابه ولاهي بعادة
قريب منا ماخبرناه نايد

تمت وصلى الله على سيد الامه
ماناحت الورقا بروس الجرايد
(عبدالله بن محمد آل منجيه) أبوراكان

ابو ماجد

حيا الله الوافي وسيع البنايد
شاعر تعلى بالقصايد وفايد

عينه على عصم القوافي نظرها
وسمه على قول الجزيلات سايد

متعلي بالطيب من طيب راسه
زايد وبأفعال المطاليق زايد

هذاك بوراكان زبن الجمايل
الأوسمه متقلدنها قلايد

الأصل طيب ماخذى الطيب عاره
ورث الجدود ولا حدى عنه حايد

صلب ال منجيه من اول وتالي
للطيب طيب وللضدايد ضدايد

حزام جنب وللمواقف جملها
لا ثارت الهيجا وشبت وقايد

اهل الشيم تحرص على قول ونعم
واللاش عاش ولا حصد له حصايد

ياما خذى طيب المطاليق بيده
كل بفعل الكفو شاهد وشايد

تسلم وتبقى وانت للطيب قدوه
منك انتعلم والمحبه تزايد

تسأل ولا يسأل سوى من يهمه
وضع الصديق ولا يحده حدايد

وانا مقدر لك شعورك وطيبك
ولاهي غريبه ياوسيع البنايد

لوابتعدنا رالظروف اجبرتنا
الطيب لك يبقى ولاهو بايد