ألا ياهل اللكزس عسى منتواكم خير=على وارد الساير جدادٍ توايرها

ليا خرجت من مركز السالمي عصير=ختم الجواز وكل الأوراق صدّرها

وركّب عليها لوحة المملكه تصدير=دفعنا ثمنها مانحسب خسايرها

أبا أوسّع الخاطر عليها وأغيض الغير=أغيض العواذل وأهل الحقد أبقهرها

إليّا كيّم العدّاد لكزوزها صفير=صفير ام خمس إليا تصالت ذخايرها

عليها غلامٍ منوته بعد خط السير=ينومس خويّه والمسافات خابرها

أنا ماعليّه من هل الطبل والتزمير=هل الزمره اللي طيبها في حناجرها

تجمّع على ماقيل عميان هو وصوير=يحسب المراجل في علومٍ يفسّرها

وهو يوم وقت المنفعه ماذكر بالخير=مغادر دياره تسعة أشهر وهاجرها

وانا لو بغيت اطوّل القاف والتعبير=تضيق الدفاتر والمعاني نسطرها

وهذي تعابيرٍ عسى المستمع بصير=يعرف الهدف والعلم في قلب شاعرها