https://blogger.googleusercontent.co...lowers%201.jpg


الشاعر : مالك عجيب

بعد ما راحوا ضيوفي هواجيسي تجي وتروح
تداعب خاطرٍ ما هوب لا قابل ولا راضي
تعن خيول عذبات القصيد وبابها مفتوح
تقول إنها تجدد ما مضى من وقتي الماضي
سقى الله يوم ارسّيها مثل مرسى سفينة نوح
على بحر الهوى وأمواجه اللي صعب تنخاضي
وأنا هالحين مع برد الشتاء كني مضيّع روح
تحت برق الغرام اللي مع خيال الشقا ناضي
أثر برد الشتاء يحيي جروح العاشق المجروح
ويملا بالحزن قلبٍ ما هوب من الهوى فاضي
كشفت جروح في روحي وباقي فالفؤاد جروح
ولا أدري من عليه أشكي ولا أدري من هو القاضي
عزاي إني ليا ناح الحمام أجاوبه بالنوح
وأصير لما يصير من الأسى والهم متغاضي
مقادير الغرام اللي تخط حروفها فاللوح
تكيل من الشقى للي يضم الحب ويحاضي
وأنا أحاضي غرامي لين باح الصبر قبل أبوح
بسرٍ في معاليق الخفايا كنه اللاضي
يا زفرات المشاعر وين عن درب الغرام أروح
مادام إني من طعون الهوى ماني بمتقاضي