قال الشاعر بدر الحويفي
 

قال الشاعر بدر عواد الحويفي الحربي رحمه الله
هذه الابيات يعزم فيها الشاعر عبدالله بن نايف بن عون العتيبي
ويعزم الشاعر عبدالله بن زويبن الحربي .

يقول الشاعر بدر الحويفي



انا مـن العتبان نــاديــت رجـال
وايضـاً معه مـن حرب رجال ثاني

نـبـي لـنا جلـسه عـلـى كيف بدلال
وســوالــفٍ فـيـهــا قـصيد ومعاني

شـعـرٍ نـقـي ماهو تصانيف جـهال
تـعـبـيـر فن مـعـاصـريـن الـزمانـي

هذا الهدف واللي طرالي على البال
شـوف الـرجال معـربـين المـجاني

مـن خيرت الشعار ذربـيـن الأفعال
عـندي لـهم تـقـديـر سر وبـياني

مـن خيرت العالم عوارف وعـقـال
وبـالـمـرجله مـقدارهم مـايـهـانــي

والـنــاس كلٍ له مـكـانـه ومـنــزال
والأرض كـورتـهـا رفـاع وطـمـاني

هذا مثل من ضمن الأمـثال ينقال
وساس الحجر يرفع حصون المباني

مـنـي لهم تـقـديـر في كل منوال
يشهد على مضمون قلـبي لسـاني

ارسـلـتـهـا يم الـنـشـاما بــجـوال
اطلب زيـارتـهم يــجون بـمـكـاني

لاسيروا يمي وشاهدت الأبـطال
فرصه سعيده مثل عيد رمضاني

وجهت عشر ابيات من هيض الأمثال
وذكرت لي مـوجز صحيح وكفاني


رد عليه الشاعر عبدالله بن نايف بن عون العتيبي
بهذه القصيده

يعيـش راعـي دلـةٍ مالـهـا اشـكـال
مــن فـايــدت فنجـالـهـا مانـسـانـي

من يوم دق بهارها عبر الأرسـال
صـكـة عـلـيّ بريـحـة الزعفـرانـي

لو دونهـا حالـت مسافـات الأميـال
هـب الشمـال بريحهـا لـيـن جـانـي

ومنها على الهاتف تقهويت فنجال
هيلـه مـن الحبشـي وبـنـه يمـانـي

مــن مــوردٍ ياليتـنـي مـنـه مكـتـال
لاشك صعب السلـم عنـه ايحدانـي

يكتال منه اللـي ليـا اختـار ماعـال
وليـا وسـم مايـاسـم إلا السمـانـي

امثال ابـو سلمـان كسـاب الأنفـال
الـلــي يحاكـيـنـا بـسـحـر البـيـانـي

لـه سمعـةٍ تبقـى الـى تالـي الـتـال
ابين من المشعل على ضلع اباني

فـرايـدٍ غـنـت بـهـا الـنـاس مـــوال
يلجا لها اللـي مـن همومـه يعانـي

يابـن زويبـن جعـل تفـداك الأنــذال
مـاعـدك إلا واحـــدٍ مـــن خـوانــي

نبـي نـزور مـعـرب الـعـم والـخـال
اللي على الهاتف دعـاك ودعانـي

ناخذ لنا عند اصبـح الوجـه مقيـال
حـنــا شـفـاويـه وهـــو مرحـبـانـي