منتديات قبائل شمران الرسمية - ما ينفع الخايف والأيام عجلات

- المنقولات الأدبية (http://vb.shmran.net/forumdisplay.php?f=153)

- - ما ينفع الخايف والأيام عجلات (http://vb.shmran.net/showthread.php?t=48607)

ما ينفع الخايف والأيام عجلات ( بدع ورد )

قصيدة خادم الحرمين الشريفين الملك فهد بن عبدالعزيز رحمه الله عندما كان مريضاً في لندن في شهر شوال من عام 1385هجري حيث بعثها إلى الامير فهد بن سعد يشكو فيها قساوة المرض حيث قال

يابو سعد صارت على اخوك غارات
شهرين أقاسي من شديد الغرابيل

سو المرض يحمل على اخوك حملات
مافي يدي حيله ولا في يدي حيل

والله فزع من فوق سبع السماوات
وأنا احمد الله يوم صارت تساهيل

ما ينفع الخايف والأيام عجلات
الخوف ما ينفع ولا القول والقيل

حنا هل العوجا ولا به مروات
شرب المصايب مثل شرب الفناجيل

لاشك أنا مشغول في كل الأوقات
على الذي حنا بظله رجاجيل

ماني على نفسي كثير الحسافات
لاسلم رأسه روسنا رفاع بالحيل

حامي حمانا بالليالي المخيفات
لو صار بالعالم كثير الزلايل

فخر العروبة بالعدل والمساواة
هذاك هو فيصل ولا فيه تشكيل

يشهد له اللي شاهدوا منه ليات
ويشهد له التاريخ جيل بعد جيل

فأجابه الأمير \ فهد بن سعد رحمه الله بهذه القصيدة :

يا مرحبا بكتاب زبن المخلات
أهلا هلا به عد وبل الهماليل

حمدت من زال الكدر بالمسرات
فكاك من صكت عليه المحابيل

فزع لك اللي عالم بالخفيات
مبري جروح أيوب غيث المراميل

لعل ما يزعج على فقدك أصوات
ولعلها لك يابو فيصل تماهيل

الله يجيرك من صواديف الآفات
عساك تسلم ياعشير المشاكيل

ماانت برخيص يا ربيع القرابات
لو هي بالأيدي كان دونك حلا حيل

ترا لنا بك يا فتى الجود هقوات
في وقتنا الحاضر وباللي مقابيل

يفداك ربع قصروا بالمهمات
اللي على القالات ما تنطح الشيل

بعض العرب حي ومن عرض الأموات
ما يرتجي نفعه بحل المشاكيل

وفيصل ذرانا بالسنين المخيفات
هو درعنا الضافي إلى ضدنا الميل

اللي نقل عنا حمول ثقيلات
راس الحصيل إن كملن الحصيل