منتديات قبائل شمران الرسمية - -:::قـصيدة اجتماعية فكاهيه:::-

سبحان من يرزق بتوع الملاييـن= الرازق اللي ما يخيب الرجـا بـه

لي عم عنده معـرضٍ للصواليـن =أموت واعرف بس من وين جابـه

وإذا سألته قـال بعـت الدكاكيـن=ما يدري إني ما هضمت الإجابـة

الشاهد إني رحت له قبـل يوميـن=في قصره العامـر ودقيـت بابـه

قال أرحب أرحب عدّد ورد البساتين=يا مرحبا باللـي لفـا يـا هلا بـه

قلت البقا عـدّ النفـل والرياحيـن =يا شيخ شمل أهل الكرم والذرابـه

قال اسلم الله يحفظك لي من العين=وآمر أوامر حضرتـك مستجابـة

قلت الصراحة طالبٍ قرب غاليـن= ودي تزوجنـي كريمتـك يـابـه

ثنّى وقال أهليـن والله وسهليـن=والكون ترخص لجل عينك رقابـه

لكن ترا عندي شـروط وقوانيـن=قلت اشرط اشرط يا حبيب الغلابـة

قال أولاً مهر العروسـة ثمانيـن=غير الرسوم وغير حق العصابـة

والثانية عمك يبي منـك سبعيـن=رسم الأبـوّة والنسـب والقرابـة

وأم العروسة حقها منـك ستيـن=عشانها ست الحسـن والمهابـة

وإخوانها كلن يبي منـك خمسيـن=عداً ونقـداً تنـدرج فـي حسابـه

وخواتها الخمس عطهن من ثلاثين=عشان تتوثـق عـروق النسابـة

وتجيب طقم عيار واحد وعشرين=وخاتم من الماس المصفى ترابـه

وأكياس متروسة كعوب وفساتيـن=ألوانهـا وأشكالهـا مـا تشابـه

وموتر بسواقـه وفيـلا بدوريـن=أثاثهـا مـن بطرتـه ينحكـى بـه

واحجز لنا قاعة بقصر السلاطيـن=واحجز بهـا رقاصتيـن وربابـه

هذي الشروط اللي على بالي الحين=وذكرني اللي ما حسبنـا حسابـه

قلت اذكر الله يا عـدو المساكيـن=واستغفـره لا يبتلـيـك بعـذابـه

الظاهر إنك منت عارف أنا ميـن =أنا لو أرقى فـوق متـن السحابـه

ما جبت حتى نص درزن مواعيـن=واضحك بكيفك واعتبرهـا دعابـة

شروطكم هذي شـروط المجانيـن=شروطكم شغـل ابتـزاز ونهابـه

شروطكم تقصم ظهـور البعاريـن=شروطكـم همّـن وغـم وكآبـه

شروطكم والله سيوف وسكاكيـن=تذبح بنات المجتمع مـع شبابـه

وين الرضا والعطف واليسر والليـن=اللي ذكرهـا الله بمحكـم كتابـه

وين الصفات اللي أمرنا بها الديـن =وين اختفى نهج النبي والصحابـة

يا عم جعل اللي خلقنا من الطيـن=يرد عقلك مـن خطـاه لصوابـه

ويجعل نصيبي عند غيرك قل آمين=ويحسن عزا الصابر ويجزل ثوابه

قال أنت لو فكرت تفكير صاحيـن=ما شفت في مجمل شروطي غرابه

حنا بعصـر العولمـة والمزاييـن = ماهوب عصر الفلسفة والخطابـة

الناس تسعى للرتـب والنياشيـن=وأنت اهتمامك بالشعـر والكتابـة

والشعر ما ينفعك لو هو دواويـن= دام جيبك مثـل بيـت الخرابـة

يا بوك لا تسمع كلام المصاخيـن=اسأل مجرب عاش في وسط غابه

قلت الله أكبر يا محـرر فلسطيـن = يسمعك يحسبك ذيـب الذيابـه

تراك شايب رأس مالـك رياليـن =البنت ما تسوى جنـاح الذبابـة

قال انقلع مالت على وجهك الشين=عاد أشوفـك عندنـا يالزلابـه

قلت ابشر أبشر لكن الباب من وين=أقفيت من عنده على صوت بابـه