منتديات قبائل شمران الرسمية

يقولون كيف الحال وأقول طاب الحال
ترى الحال طيب دام الأحوال مستوره

فلا يقهر الرجال او يذبح الرجال
يكون اليدين اللي من المال مبتوره

وانا الحمد لله عايش بخير والأحوال
تسر اصدقاي وكل الأنذال مقهوره

وهذا بفضل الله وفضله نعم وجزال
خلقنا ورزق العبد بيده ومقدوره

تدوم النعم بالشكر قول الله المتعال
وناس طغت في نعمة الله معثوره

فلا دامت النعمه لعاصي ولا مختال
الأيام حبلى والليالي لها دوره

ترى الوقت له في كل يوم انقلاب وحال
ولا فيه مخلوق سلم من عنا جوره

فمن يامن الدنيا وغدر الزمن قتال
يعيش الندم ومن الندم يحترق زوره

كما الضامي اللي مارتوى من سراب اللال
يغره وفجأه ينقلب عكس للصوره

مثل مايغرك بعض الأحيان كبر ازوال
وهي دون هقوة من تهقوى ومغروره

زمان يضم اللاش والنذل والدجال
زمان يخلي الآدمي يفقد شعوره

زمان كثير الشر والحسد والأهوال
عقول البشر من جور ذالوقت مبهوره

زمن يرفع الأنذال ويهين روس رجال
وسادت ضعاف الناس في كل معموره

تذكرت وقت فات يوم الرجال جمال
تفاخر وبأفعال المطاليق مذكوره

برغم الشقى والجوع والجهل وقل المال
يموت الرجل منهم ولا بين قصوره

يعيشون للعليا وتاريخهم لازال
كتب بالدما والروس بالعز منصوره

فيا الله ياللي بيدك الخير والأجال
اسالك توفقني على الطيب واموره

واسالك تقديني على طيب الأعمال
وطيب العمل طاعتك والنفس ماموره

زهير بن مداوس ال حمدان الشمراني ( ابو ماجد )