|
قصة خياليه
اخواني اعضاء وضيوف المنتدى كيف حالكم ان شالله طيبين أقدم لكم قصة يمكن أحدكم سمعها وبالنسبه لي اذكرهاا من انا صغير ولا هلحين في مخيلتي أذكر يوم شيباننا يقصونها علينا كنا داخلين جو مهو وراعين هاليومين سبستون مع انها فيها اشياء طيبه كنن و توم & جيري المهم هذي القصة معروفه عند البدو والقصة خيـــــــــــالــيـــــه ولاكن فيها عبره وفيها حكمه ما راح أقول لكم الحكمه من القصه الا بعد نهايتهااااا اترككم مع القصة قبل لاتقراها... طــف الليت وابتعد عن الازعاج الله يعيني على الكتابه الحرف اضيعه بعض المرات نص ساعه بداية القصة........ يقول كان فيه ولد عمره حول 18 وكان عند ابوه وعمته الا هي مرة ابوه وكان يرعى حلال ابوه الغنم والبل ويرجع حول المغرب ويلقى عمته منتظرته صياح وصباح وهواش ولعان خلها على ربك... وعلى هالحال كل يوم الولد مسكين قايم بواجب ابوه وخادمه بس عمته ما تبيه .... المهم جاء يوم وهو راجع من المرعى الا عمته زايد عندها الطلاب شوي الاعلى دخلت ابوه وش فيه وش السالفه قالت عمته الولد سوى وسوى وسوى الولد مسكين محترم عمته وساكت قال ابوه يا ولدي مالك مقعاد في هذا المكان طبعا ً ما قال الكلام هذا الابعد تحريض من زوجته بطرد ولده عن البيت ليصبح رجلا ً المهم شال الولد قشه وراح هايم على وجهه يدور رزقه بين العرب وهو ماشي لقى غزال يركض وراه ذيب طلع البندق ورمى الذيب وخلى الغزال يروح ..(( افتك الغزال من الذيب)) مشى يومين في البريه لقى شجره ونام تحتها .. قام على صوت واحد يصوت له.. ياولد ياصبي ياللي نايم قام الولد سلام وعليكم السلام كيف حالك .. طيب.. نشد الرجال الولد وين رايح من وين جاي قال الولد رايح ادور رزقي في أرض الله قال الرجال تبيني اخاويك وندور رزقنا سوى قال الولد اي والله ابيك تخاويني وتسليني واسليك قال الرجال خلاص بس على شرط قال الولد وشهو شرطك قال اي شي نلقاه نتقاسمه سوى واي شي اقولك سوه تسويه قال الولد .........تم قال الرجال اتفقنا .. ابسمي نفسي الامير وانت الشيخ قال الولد خلاص يالامير راحوا الرياجيل من ديره في ديره مروا على واحد يطرد الغزلان على رجله سلام ...وعليكم السلام طلع يعرف الامير من اللي معك قال هذا رفيقي الشيخ قال وين انتم رايحين قالوا ندور رزقنا قال معكم قالوا حياك مشوا الريجيل ومروا على واحد يلعب بالحصى في يدينه يحذف ذي ويمسك ذي والحصاه الوحده كبر السياره سلام ياراعي الحصى قال وعليكم السلام طلع يعرف الامير كيف الحال..طيبين..عرفه على اخوياه راعي الغزلان والشيخ قال وين انتم رايحين قالوا ندور رزقنا قال معكم قالوا حياك مشوا من ديره في ديره لقوا واحد ياكل بعير لحاله لقوه يتعرمش عضامه سلام ياراعي البعير ... قال وعليكم السلام طلع يعرف الامير ..وشلونك ..عرفهم على ربعه الشيخ وراعي الغزلان وراعي الحصى قال راعي البعير وين انتم رايحين قالوا ندور رزقنا قال معكم قالوا حياك راحوا الريجيل لقبيله من احدى القبايل ريس هالقبيله عنده بنت وحيده فيها مشكله كل واحد يتزوجها مايصبح الا وهو ميت وشرط امير القبيله ان اللي يتزوجها ويصبح حي ياخذ نص حلاله والبنت المهم راح الامير وخوياه الى هذي القبيله تعشوا وعينوا خير قال الامير للشيخ اللي هو رفيقه وش رايك تاخذ بنت ريس القبيله قال الشيخ هذي اللي يتزوجها مايصبح حي قال الامير ماعليك تزوجها رفظ الشيخ قال الامير تذكر شرطنا اني اذا قلت لك شي تقول تم قال الشيخ تم اتزوجهااا راحوا وخطبوا البنت من ابوها قال ترى البنت فيها مشكله قال الامير نعرفها قال ريس القبيله عندي شروط قال عطناها قال اول شي لازم تسبقون الفارس الفلاني راعي الخيل الفلانيه .... قال الامير ولا يهمك قبلنا راحوا الى حلبة السباق جابوا لهم ذاك الحصان الاصيل قال الامير مانبيه خوينا يسابقه على رجلينه نادى الامير راعي الغزلان قال سابق راعي الفرس هذي قال ما هنا مشاكل نسبقه تسابقوا وسبق راعي الغزلان قال ريس القبيله باقي شرطين قال الامير عطناها قال لازم تهزمون العبد الفلان.... مطارحه قال الامير مهنا مشاكل خوينا راعي الحصى كخ كيخ طح طيح .. الا العبد من صيد امس فاز خويهم قال ريس القبيله باقي اخر شرط قال الامير عطناه قال ريس القبيله لازم تاكلون هالمفطحات خرفان حوالي عشرين صحن ...لحالكم قال الامير خوينا راعي البعير وياكلها راعي البعير سلام سلام قال ريس القبيله العرس الليله غنوا وسهروا واحتفلوا المعرس الشيخ والعروس بنت ريس القبيله جاء وقت الدخله قال الامير لازم ادخل معك قال الشيخ وش لون قال الامير تذكر شرطنا اي شي اتقاسم انا وياك قال الشيخ تم.. دخل الشيخ والامير على البنت سوى قرب الشيخ من البنت .. طلع له ديبان (حيايا)من جنبها ومن تحتها طلع سيفه الامير وقص روس الديبان كلها وقال الامير للشيخ خلاص امرح مع مرتك وطلع عنهم الصبح ينتظر الامير وخوياه و ريس القبيله خروج الشيخ حيا ً من خيمة العروس طلع الشيخ حي راح هو والامير الى ريس القبيله وقالوا له هاااا .. وين نص حلالك قال هذا نص حلالي على حسب الاتفاق بيننا قبل العرس قالوا بيض الله وجهك حنا نستاذن نبا ناخذ الحلال والمره قال الشيخ حقكم الله يستر عليكم مشوا الريجيل راجعين من نفس الطريق الي جائم منه معه الحلال والمره وخوياهم مروا على مكان راعي البعير نزل راعي البعير وقال استاذن وودعهم مروا على مكان راعي الحصى وقال استاذن وودعهم مروا على مكان راعي الغزلان وقال استاذن وودعهم رجع الامير والشيخ والمره الى نفس الشجره اللي تقابل فيها الامير والشيخ اول مره قال الامير للشيخ يالله خلنا نعزل الحلال ونتقاسمه حسب الاتفاق بيننا قال الشيخ هذا حقك وبدوا يعزلون العبيد والغنم والبل والذهب ووو..الخ قسموا الحلال بينهم بالتساوي قال الامير باقي المره لازم نتقاسمها قال الشيخ هذي لي قال الامير نسيت الاتفاق قال الشيخ وشلون نتقاسمهااااااااااااااااا قال الامير بسيطه نربطها بالشجره ونقسمها نصين ربطوا المره في الشجره رفع الامير سيفه عشان يظربهاااا به نصين هد السيف عليها يوم قرب من بطنها وقف ... راحت المره ترجع اللي في بطنها وطلع ديبان صغار واجد قال الامير للشيخ فك مرتك هالحين المره تشافت وماعاد فيها شي وخذ المره والحلال كله ما ابي شي قال الشيخ هذا حلالك حسب اتفاقنا النص بالنص قال الامير ما ابيه كله لك انت راعي الاوله انت اللي فكيتني من الذيب لاياكلني واعترف له الامير بأنه هو الغزال اللي فكه من الذيب وسلامتكم انتهت القصه بعد عناء الكتابه وقبل لا انسى في القصه حكم ومنها الوعد ..وعد الحر دين ...والجميل..المعروف..تربيتك سهر والديك..اكبر جميل يقولون راعي الاوله وهو المقصود بان راعي الجميل الاول مهما فعلت لاتستطيع رد جميله فكيف من رباك وسهر عليك على العموم ان شالله انكم من اللي لاوعدوا مايخلفون ومن اللي يبرون والديهم منقول |
رد: قصة خياليه
تسلم يمينك بسرد هذي القصة
لاهنت |
رد: قصة خياليه
لك الشكراخي معقل العصاه على المرور الرايع
|
رد: قصة خياليه
يعطيك العافيه وشكرا لك
|
رد: قصة خياليه
|
رد: قصة خياليه
فيها عبر ولكن فعلا خياليه تحياتي
|
رد: قصة خياليه
جميع من كان له رد بهذا الطرح فله مني الف شكر
|
| الساعة الآن 05:39 PM. |
Powered by vBulletin® Version 3.8.7
Copyright ©2000 - 2024, vBulletin Solutions, Inc. Trans by
جميع الحقوق محفوظة لـ منتديات شمران الرسمية