منتديات قبائل شمران الرسمية - امس الضحى عديت في نايف الحيد

- المنقولات الأدبية (http://vb.shmran.net/forumdisplay.php?f=153)

- - امس الضحى عديت في نايف الحيد (http://vb.shmran.net/showthread.php?t=51035)

امس الضحى عديت في نايف الحيد

قصيدة نادرة لأحد عمالقة الشعر الشعبي
الشاعر بندر بن سرور رحمه الله
وهذه القصيدة لم تأخذ صداها
كغيرها من القصائد الشهيرة
لهذا الشاعر الكبير رحمه الله
واليكم أبيات القصيدة..

امس الضحى عديت في نايف الحيد
مابين شعر (وبين خشم الفريده)

مثلي على المبداء يحده حواديد
يصمد وراع الـهم مـاله صمـيده

يسوقه الهاجوس سوق المعاويد
من الضيق كنه فوق حام الوقيده

همٍ يقدد ثومـة القـلب تقديد
يا هنيكم ياأهل القلوب البليده

لو اني ارقد نوم بعـض السلابيد
ماشفـت حالي ناحلٍ كالجريده

النوم للي مايحـسـب المناقيد
ماهمه الا كيف يملا مسيده

لا ناطحٍ قاله ولا جايبن فـيد
وليا فـتح عينه لقـاها رغـيـده

راحوا وخلوهـا الرجال الصناديد
قرنٍ لحقـته مابقا له شريده

يوم الطمع دونه رمـاح وبواريد
والنذل تنشـب كلمته فـي وريده

الحر يفرس والحـباري مجالـيد
يعرف بهـا الطيـب من ايا بديده

مايعرفون ابها هل الحسد والكيد
ولا يفتخر راع الرصـيد برصـيده

واليا اختلف سلم العرب والتقاليد
من مات منهـو لا تعده فقـيده

لو هو قريبٍ منك فرقى الردي عيد
جعله مـن الدنيا يعجل شـديده

يعيش معـزولٍ عن الناس ووحيد
اخير من قرب الوجـيه القريده

يوم اني اذكر بعض الاحوال يافهيد
الوقت جافي والـموارد زهـيده

وان حدة الحاجه لبعض الرعاديد
اليوم ماينفع عضـيدن عضـيده

نفسي معودها على الصبر تعويد
والصبر نكسب به صفاتٍ حميده

وخير الكلام الذكر من غير تحديد
مع خالص النيه وطيـب العقـيده

يقولـه اللي مانشد زيد وعبـيـد
بالمصحـف الطاهر لقى مايفيده

من طبق اللي فيه نـال المقاصيد
وسلك طريق اهل الحياة السعيده

مايستوون اهل القشر والاجاويـد
الله فرقـهـم فــي امــورٍ عـديــده

قال : اعملوا تلقون والكم مواعيد
اجل قصير ومن قضى اجله نعيده

مرجاعهم لله جمـوع وتفـاريد
والله بخلقه يفعل اللي يريده

دنياك مافيها حيـاةٍ سرامـيد
زرع الفنا لابد له من حصيـده

من سار بالسكه وصل لاخر السيد
العبد لابد المنايا تـصـيـده

ترا المـنايا للبـرايا حواصـيـد
والموت له مع كل نفـس وعيـده

والرابح اللي من هل الخير وشهيد
وادرك بحسن الخلق مرضاة سيده

حبـله يـورد طـيـبـات الـمواريـد
يـاصـار مع ربه حبـاله جـويـده

والحكم للي يبدي الخلق ويعيـد
هو ربنا الواحد وحـنـا عبـيـده

الشاعر... بندر بن سرور