هِزِّي إليكِ العُود يتساقط تناهيد وغرام
 

‏هِزِّي إليكِ العُود يتساقط تناهيد وغرام
‏على شجون الكُرْد هِزِّي العُود مَرَّة ثانية

‏ما يصلح لهذا المقام إلا مثل هذا المقام
‏غَنِّي لنا يا مْصَبِّر المَوعود مرة ثانية

‏إذا نزل صوتك على جِدْب المشاعر يا سلام
‏تصير نبضات القلوب وْرود مرة ثانية

‏وإذا انحنَى عُودك على عُودك خَلَص كل الكلام
‏أحسّ بِإنّ الله بَعَث داوود مرة ثانية

‏تمايلي والليل تَوّه ليه أنام وكيف أنام
‏جُودي على روحي من الموجود مرة ثانية

‏الحين حتى لو يروح الليل ما راح الظلام
‏مدري متى لون الحياة يْعود مرة ثانية

‏تقدَّم الساحر مكان الراهب ومات الغُلام
‏وأصحاب الأخدود اِحفرَوا الأخدود مرة ثانية

‏تمايلي يا أم العيون السود وإن قالوا حرام
‏تمايلي يا أم العيون السود مرة ثانية

مشعل الزعبي