ما خفت من حاسد لحقني بغلّه
 

ما خفت من حاسد لحقني بغلّه
لأن الحسود يموت مجمل حياته

خوفي من اللي معلن الودّ كلّه
ضامر شعورٍ ما تطيقه صفاته

في داخله اشياء تكلّم وأدلّه
احسّها لو ما تقوله شفاته

روحي عن شموس التردّي تظلّه
وتعذرْه لأن القلب شايل غلاته

ليته درى عن ما جرى في محلّه
يومه رمى بسهام غيضه مهاته

اللي وفى واخلص من الناس قِلّه
يومي فتحت القلب باربع جهاته

من لام قلبي فاختياره لخلّه!
ما يقدر يلوم الشجر في حَتاته

للكون سنّه باختلاف الأهلّه
وطبع البنادم يرثع فـ تضحياته

شمّت الاعداء فيني بـ كلّ زلّه
ياويل قلبي من ردى ذكرياته

تبقى النوايا بيض والشاهد الله
لكن ماعاد القلب مَسرح شماته

؟؟؟