فقدك الندى واول طريقي وصدر الدار
 

‏فقدك الندى واول طريقي وصدر الدار
‏يا وجهٍ لو تْملّ الصور منه ما أملّه

‏معك كنّي أخذ في فضى ليلتي مشوار
‏واجاذبك صبحٍ يفهَق العمر عن حِلّه

‏عكفك الجفاف إن مرت الناس والزوار
‏شجر واديٍ كم مرّه الغيم ما بلّه

‏تساقط يباس وشرهته ما عليها غبار
‏اداري دقاقه واتطّلع على جلّه

‏مواعيد صفحٍ مالها في دجاي أنوار
‏يا ضحك العيون اللي تدوّر على الزلّه

‏أشوفك سحابٍ في مجيّه حيا وأمطار
‏وأشوفك مجي القوم والحرب والسلّه

‏وأشوفك نهارٍ ماتوارى عن الأنظار
‏يا عنّك إنّي أفضّل شموسه على ظِلّه

‏تعال إن بدأ لك في دروبي ضحى وديار
‏هذا الصدر مرتع وأنت خابره وتْدله

‏معي وجه علم وليلٍ أدلم وضيقة ثار
‏وأنا لا لمحتك يسري القلب عن غلّه

‏خذ اول شبابي عمر لا شحت الاعمار
‏وإذا كان مايكفي فداك العمر كله

محمد السلطان