فوق هام السحب ( الشعر الشعبي) على متن القوافي

‏وش عذركم ياتاركين الصلوات
ياويلكم من الموت ياتاركيها

بتعيش في دنيا العنا لك سنوات
وبتروح منها كنك ماعشت فيها

تدري على ويش الندم والحسافات
ماهو على الدنيا ولا من عليها

تندم على جنه بعرض السموات
ولا لك ولاحسنات تدخلك فيها

.....

‏جمّل حياتك بالتقى والصلوات
وابعد عن فعول الردى والرذيله

وفوّض امورك للولي بالمهمات
مايخسر اللـي كان ربـه وكيـله

النار حفّت بالترف والشهوات
والنفس فيـهـا للملـذات ميـله

درب النجاة اللي نعيمٍ وجنات
ترك المعاصي واتباع الفضيله

.....

اسجد لربك كل ماجاك هوجاس
تلقى بسجودك كل عز ومسره

ربك حفظ سر الخلايق عن الناس
والخلق ماتحفظ لمخلوق سره

وابعد عن اللي خوّته مالها ساس
ما هو ترى معقود سِـرّك بسرّه

الورد يدخل با الأسره والانفاس
والشوك مايدخل بصنع الأسِرّه

.....

في خاطري بوح مايستوعبه فكرك
‏حتى حروف القصيد يضيع معناها

‏لاتقول لي كيف هذا البوح في صدرك
‏خل المعاني تسولف لك من اقصاها

‏اللي دعاني هواك وسالفة عطرك
‏واحلام ليل معك يابعد مسراها

.....

كم جاهل متابعينه ملايين
وكم من مثقف مالقى الا التجاهل

وان تابعك من نخبة الناس عشرين
تراهم ابرك من مية الف جاهل

.....
‎

يكفي عتب وتقلب جروح الأيام
ويكفي سهر والعين عافت منامه

نمسي ونصبح ملنا كود الأقلام
نشكي من الدنيا عليها سلامه

يادمع من عيني شكت حبر وقلام
تسكب على قرطاس فوقه كلامه

......