ديوان قصائد لشعراء المملكة العربية السعودية (متجدد)☘️☘️

أغنّي لك ؟
أنا محتاج لي ليلٍ طويل وضحكةٍ عذرى ..!!
وروحٍ كلّ ما رفّ الحنين بداخلي تقرى ..!!
بقى بالله أحد يقرى الحديث ب روح؟
ولا واحد من الأحباب ..
قدر يتوغّل بروح الكلام المزدحم بالصمت ..
لذلك كان لا بدّ الكلام يموت ..
وأنا شاعر ..
متى مات الكلام بدفتره بيموت ..
ولا أبغى أمرّ مرور العابرين الممتلين بسخف ..
ولا أبغى أكون للنسيان ..
أنا أخترت الطريق الصعب ..
وأنا عارف من أوّل ما تخيّرت الطريق إنّ التعب أكثر ..
وقدرت أمشي
وأعدّي عمر من عمري ..
كأني أهرب من الوقت ..
تجين إن ضقت أغنّي لك ..
أنا صوتي يجي مثل المطر لا ضقت ..
وأغني لك ..
دخيل عيونك أن هبّ الحنين شلون؟
أقول أشتقت؟
أقول أنّي فقدتك عمر؟
أقولّ أنّ المفارق جمر؟
أغنّي لك؟
ياليت أقدر ..
أنا يا جنّة الدنيا تعدّاني كثير الوقت ..
كثير أشتقت ..
ولا جيتك ..
ولا أقدر أجي مثلي مثل غيري ..
ولا أقدر أجي مثلي ..
أنا للأمس ولبكرة ..
ولا عمري قدرت أحضر عشان اليوم ..
وأحبّك بيني وبيني ..
وأحبّك أكثر من اللي ببالك مرّ ..
وبكرة بعد ما يقطف خريفي أجمل أوراقي ..
بعد ما أكفّن الدفتر ..
بتدرين أنّك أجمل ما كتبته للزمان الجاي ..
وتبقين بثغر طفلة تردد صوتي اللي مات ..
كثير الحكي لكنّ الكلام يغصّ بعيون الدموع ويلتجي للصمت ..
لذلك كان لا بدّ الكلام يموت ..
وأنا شاعر ..
متى مات الكلام بدفتره بيموت ..
نواف التركي

تعال أمطر
تعال أمطر ..
يبس غصن الكلام المورق الأخضر ..
ولا ساقي ..
ولا غيمة يبللّ ضحكها أرواقي ..
سنين وشاعرك يقطف عناقيد الكلام العذب ..
ولاغايب قدر يرجع ..
ياليت العمر.. شريط أقدر أعيده كل ما غايب بذر نبتة غلاه بداخلي وأقفى ..
عشان من أوّله أجفى ..
عشان أرتاح من هذا الحنين اللي تغافلني وجاب أقصاي ..
تعال أمطر ..
عشان يكون للدنيا طعم ثاني ..
عشان أذكرك وأنساني ..
عشاني كان باقي لي بقلبك شي ..
عشاني مو عشان الشعر ..
مدد يا سيّد أوجاعي ..
كذا ماعادت الدنيا تساوي شيّ ..
كذا ما أحسّ بأنّي حيّ ..
أنا محتاج لك حتى لو أنّك جرح ..
تعال الليلة أكثر من كذا وأكثر ..
تعال أمطر
تعال امطر
تعال أبيك اليوم
خل بكرة لبكرة
طيّر حمام النوم
لو كنت بي مكره
خلّ الكلام يحوم
وأقنص لك الفكرة
تعال وشوف وشلون أبعث الميّت من الأحساس من قبره ..
تعال أنفخ لك بروح الشعر ما يطرب الأوراح ..
أنا ياسيدّي ربّ الكلام الموجع المرتاح ..
تعال أمطر ..
يبس غصن الكلام المورق الأخضر
ذبلت بغيبتك يا ساقي أحزاني
حسبت أنّي على هذا الغياب أقدر
وقلت أسلّمك لكفوف نسياني
وكان الدرب موحش والحنين أكثر
وكنت بكل درب أروح تلقاني
وكانت كل رغبة داخلي تصغر ..
وكنت أكبر..
ووحدك داخلي تكبر ..
أخيراً والحديث الموجع أحياناً هو الأحساس ..
أمانة خلّني بك غير كل الناس ..
ورح مسموح ..
لا ترجع ..
ولا يورق بعدك أحساس ..
ولا تمطر ..
هي الذكرى وحدها القادرة تبعث حياة بداخلي وأكتب ..
وأحسّ أني مثل هالناس ..
وأحسّ أنّ لجروحي قلب ..
وأروح أكبر ..
مثل كل الشجر لما يتساقط في خريف العمر ..
أنا ياسيّد أوجاعي بديت أسقط ..
نواف التركي