كفكف دموعك وشفني خير قدوه تقتديها

كفكف دموعك وشفني خير قدوه تقتديها
ماخذه من كلّ حاجه محزنه حقّ الدفاع

اختلق ضحكة بريئة أغلب الأحزان فيها
انتصر من ضحكتي والحاجه أم الاختراع

ما ذرفت دموع عيني لجْل شخصٍ يحتريها
وما اخاف فراق لاني صاحبة قلبٍ شجاع

لو تقاس الاهتمامات بمدى بكيي عليها
ما بكيت الا على فستان قصْر وروج ضاع

اشبه لطفلة تحَبس العبرة اللي تعتريها
ليين تبكيها على لعبة سقط فيها القناع

حالفه إنّ المسرّة يا تجيني يا اجيها
ذاخره لدروبها من معمعة صبري اقتناع

ابتغيها تضمّ حزني مثلما ضمّت يديها
الفقير اللي خلق من سلوة احلامه متاع

مختلف مفهوم تقديري للاشيا اللي ابيها
يشبه لطبع الكريم اللي هدا أكله و جاع

امي تقول ايّ حاجه ودكّ بْها اتركيها
وانت شخصٍ من غلاته رحت واهديته وداع

؟؟؟