فوق هام السحب ( الشعر الشعبي) على متن القوافي

افا يا صدري ضقت من جاير الوقت
‏خابرك يا صدري تشيل الثقايل

‏وش فيك علمني لك ايام ما رقت
‏ضايق وفيك الهم صايل وجايل

‏خابرك ما عمرك للأحزان رافقت
‏واليوم كنك شايل جبال حايل

.....

‏انا الحزين الحزين اللي عليه الكلام
‏وأنا الغريب الغريب المغترب بـ وطنه

‏وأنا الي أقصى طموحاته يعيش بـ سلام
‏فاقد شعور السلام الداخلي كم سنه

‏بعض الليالي ما مرتني مرور الكرام
‏احداثها مُحزنه وامراضها مُزمنه

‏يا صاحبي صاحبك ماهو على ما يرام
‏الحزن مثّر على نفسّيته وابدنه

.....

‏مشغلني التفكير في بعض الأمور
‏تجمعت في وقت واحد كلهّا

‏محتاج لي مخرج ومنفذ للعبور
‏للشجره اللي تحتويني ظلها

‏صبرت فالدنيا وانا مّاني صبور
‏شيّبت من كثر الهموم و حملها

من كثر مااعشق ملذات الشعور
اهم لذه ماعرفت اسعى لها

‏أحلام في عقلي و في راسي تدور
‏بس النهايه ما قدرت اوصل لها

.....

‏وين أتوجه والليالي ماتطاق؟
‏وأنت الوحيد اللي دموعي تألفه

‏ما عاد لي عقبك صحاب ولا رفاق
‏لا ولا لقى قلبي قلوب موالفه

‏ملّ الجفن يذرف دموعي الرقاق
‏خذني بـ صدرك ما بقى وجـه آلفه

‏وعلم شعوري لانزف جرحي وفاق
‏ إن الندوب اللي بـ صدري تـالفه

.....

الرعد والبرق والغيم وانسام الهبوب
والمزون اللي تشوق العيون نصوبها

ساقها الرحمن من كل حدب وكل صوب
والتقت من فوق قمة عسير دروبها

نطحت السحب الركامية جبال الجنوب
وفي سماها ذابت جنوبها في جنوبها

الشوامخ لبست الثلج والماء لبس ثوب
والسهول استقبلت ضيفها باسلوبها

الارض صارت تحت زخم النوامي والعشوب
جادلٍ صبحية العيد تلبس ثوبها

عيطموس وبنت شيخٍ معنز ومحسوب
فتنةٍ من ناصيتها الى عرقوبها

.....

‏والله اني من غيابك غدا همي كبير
‏خانقتني ضيقتي والدموع اخفيتها

‏وانعزلت بزاويه كنها سجنً عسير
‏بس اطالع للسما والدموع هليتها

‏كن ما حولي بشر كن ما حولي عشير
‏وكن طاري فرحتي من جفاك الغيتها

‏واقتنعت إنك علي حلم لا يمكن يصير
‏ليت صدك ما حصل والهموم انهيتها

.....

نسنس الحزن واجتاح الضلوع وبكيت
لو عيون الرجال اتعيب عبراتها

أدركتني وانا هليتها ما استحيت
آه يا لحظة الفرقا ولوعاتها

والله اني من الفرقا شبعت ورويت
اعرف دروبها وابخس متاهاتها

اوجعتني وانا من جورها ما حكيت
في رجا الوصل والجمعه ولذاتها

يا هوى البال هذا أنا لعيينك سريت
كان بإيدك بقايا للوصل هاتها

جيتك العام وأزريت الوصل يوم جيت
ليين عيشتنا الفرقا وحسراتها

فيك صغت اجمل بيوت الشعر بيت بيت
وردت الفعل منك طول سكاتها

علموني وانا عن حالتك ما دريت
العذر يا شقى روحي ومشهاتها

الوجع فيك وأنا اللي مرضت وشكيت
نكبة الفال ما ينفع تنهاتها

اتظاهر مع العالم وانا ما سليت
القطاعه على وجهي علاماتها

لين نسنس علي الحزن ليل وبكيت
آه يا لحظة الفرقى ولوعاتها

.....

يابنت انا عاقل ولاني بمجنون
بس الهوا يا بنت سوى سواته

منهو يلوم القلب في حب مزيون
ومنهو يرد القلب عن ذكرياته

.....

يا راكب اللي لا مشى كنه الذيب
يذخر نشاطه للديار البعيدة

يطوي الفيافي والجبال الشلاهيب
ما يشتكي من جور وقتٍ يكيده

.....

لسانك حصانك ارفقبه وريضبه
جود لجامك وقصرها على الماضي

قدام تندم على قول تلفضبه
كذبك على الناس مايقضيلك اغراضي

وراك في كل مجلاس تلامضبه
تسلخ وتطبخ وللمقفين عضاضي

يقطع كما الحد فاقرابك وتلحضبه
كذاب شذاب للعرقوب لحاضي

على المقفي تشيل اكبر من الهضبه
مليان قلبك صدى ومن الحياء فاضي

تبني من الكذب بلسانك وتنقضبه
بيت بلاساس تبنيه من الانقاضي

مدري زعل عن ضميرك تاتهيضبه
اتقصر الوقت بهروجك فالاعراضي

خلك بدربك ودربي لاتعرضبه
الناس وكبودها مليانة غاضي

وليا أمتلا وادي بالسيل فيضبه
سيله ليا سال فيض كل ملحاضي

أعطيك علم وكاد وعلمي أحمضبه
قدم الضمايا ترد بكره على الحاضي

ان كان لك قلب حي الدم ينبضبه
لاتاكل اعراض خلق الله باللا فاضي

ماعد بحد مراعي نفسك الحضبه
ولاحد مجاملك ياباشا ومتغاضي

اليا التفتنا نظرنا مانغمضبه
واول مانبغاه منك الحق والقاضي

الحق يقنع وغيره ماتفاوضبه
من مصدر الحق يرضى كل مغتاضي

تقبل وسيمه وترضى ويش يفرضبه
والكل منا يقوم وخاطره راضي

.....