الوجد كافر

الوجد كافر

الوجد كافر والروابع تسونامي = ياصل بنات الفكر في عالي ابراجي

يخلف ارامل من عواقِبْه وايتامي = وتخِرّ في جاله صناديد الامواجي

والشوق له فالقلب قرطاس واقلامي = يكتب وينشر بالمعاليق مهراجي

واحيان يطرب فوق توزيع الانغامي = واحيان يجمع بين دوره والاخراجي

نوته تسطِّرني بها اعلوم واحلامي = رغم انفي اسير ابهواها والاحجاجي

وتدوربي وادور وتبيح الانسامي = واوقف واواصل دربي ابلحظة افراجي

ياخازله روحي على راس الابهامي = تومي بها فيما بغيتي وتهتاجي

وخلفين مادري وين ربعي من اخصامي = ويهدّ زوري حيل من يبني اسياجي

قلبي ومصراعيه مفتوح لإلهامي = ياخذبني يم الغضي سيد الادعاجي

وابقى زعيم البر واهراش الاسنامي = املح فحل ويهيم في كل الافجاجي

مهادله سعبل زبدها للاقدامي = يربع على قبّ البكاير والافواجي

مرفوع ماينَّاش راسه وهو طامي = واليا ارتبع محذور في ربعه ارجاجي

بابور كيفي للملاويح واعصامي = يفتق ويثعل بطن من يرغب ازعاجي

واقوم اهيجن فوق ذروة بسلهامي = واخير بين الحمر والسود والعاجي

بنات من تنكيح فكري والانظامي = ازفَّها للحر الاشقر الى داجي

واذكرك ياعبدالله اللي من العامي = ماعاد به في بركم طرش وانعاجي

العام الاول كنت قايد ومتزامي = والجمر في ميفاك والقرص والصاجي

واليوم قرصك لايماني ولاشامي = ضيَّعت بين اهل البشاير وقرطاجي

وضيَّعت مشيك بين حِديان واقطامي = وانته معايد قريتين اهل الاهداجي

عجزت في ريشك ووصفك والاوسامي = واخذت مع شرواك لفَّه ومدراجي

ما لك وسم يعني مع الخيل يارامي = والخيل يبغاله مسارج وكرباجي

والريش ماطارت به البط وانعامي = وش وقعكم ما لك علامه ومنهاجي

والا عبط واكبار مع زيدٍ وسامي = يا زيد يا بو زيد للشعر ديباجي

ماهوب سلعة بيع يشرى وينسامي = وماهوب سبحة شيخ سبحبها راجي

وماهوب زوعة خشم ومناخف انخامي = وماهوب حجة جند تتقلد التاجي

الشعر هجرة روح مطلوبها سامي = الشعر ظرف ابداخلة شمعة اسراجي

الشعر ملجى الحس من ظلم واظلامي = الشعر من نار الغضي صرتبه ناجي

لاتقحم القاله وهو حرَّها حامي = اما لها والا انت فيما انت محتاجي

انا لها فالبر والبحر واغمامي = بازل وحرّ وجيلبوتٍ وميراجي

ملِّيت من كثر الدعاية والاسهامي = وافلس نديبي واعلن البيع باحراجي

والعلم تالي العلم صلى الله اختامي = على النبي ذا سار للعرش معراجي

وتقبلوا تحياتي