رد الشاعر/عبدالكريم الشمراني على الشاعر/وليد الرشيدي

وبعد غياب ليس بالطويل يعود لنا شاعرنا المبدع عبدالكريم الشمراني
بقصيدة جميلة ردآ على الشاعر ولـيد الرشـيدي
اليكم البدع والرد

قصيدة وليد الرشيدي)....

بعض العرب من طيب ذاتك تضيعفك * ومن قبل لا يفاجيك بالعلم فاجه
خذ انتباهك واتركه قبل يترك * ما ينومن موجن تصافق مواجه
لاتنخدع بالضحكة اعرف طوارفك * الصمت حكمه والفعل بالمواجه
وقلبك دليلك من محبك وعايفك * من لا يودك لا تدوج بمداجه
أحيان واحيان تراها تكلفك * جرح عميق من يدور علاجه
لاتقدر اللي ما يقدر مواقفك * عطه ظهرك ولا تجي له بحاجه
يمشي معك بالعكس رايه مخالفك * ياسرع ما يلوذ عنك بملاذه
لا صار ما قربه بجمبك مشرفك * ترى مزاجك ما يطابق مزاجه
وعليك من نفسك تحمل كلايفك * ولا ضيق الا من بعده انفراجه
الشغل شغلك والتصرف تصرفك * والرجل يعرف مدخله من خراجه
احذر من الباطل عن الحق ينسفك * على الرجل بعض المواقف سماجه
لا يرجع الماضي ندمك وحسايفك * خلك مع التيار والرب ناجه
واستخدم عرفك مع لزومك معارفك * كلن لعرفه لا يجوز احتجاجه
هذي نصيحة ارحم الله مكلفك * لا يصير بها لفة وانعواجه



رد عبدالكريم الشمراني)...

يا مرحبا لو كان مانيب شايفك * ترحيبتن فيها فرح وابتهاجه
أعجبتني في حبك معنى قصايدك * والشعر ماكلن نهج في نهاجه
مصادري في الشعر والا مصادرك * الكل يحصد في النهاية نتاجه
أسمع كلامك واتقبل نصايحك * وبل المطر يخفي فعول العجاجة
صل من تحب ولا تخلي فرايضك * وما همك اللي عاقدن لك حجاجه
وبع من يبيعك واشتر اللي يبايعك * ترى الخوي تعرفه وقت العواجه
واختار من بين الرجاجيل صاحبك * اللي ليا احتجته يلبسك تاجه
ولا تنثني للي يحاول يضايقك * اشرب قراح الما ويشرب هماجه
ولي صرت راعي حق فاثبت حقايقك * ولا يخلفك بالصوت راعي اللجاجه
ماكل من خاواك لا ضقت ينقذك * وما كل من يجرحك تجرح شجاجه
يمكن تعادي شخص في يوم يسعفك * ويمكن تصاحب شخص واصله خواجه
ولي ضاق صدرك فاطلب الله يخارجك * ويعطيك نورن منبعث من سراجه
خلك جمل واصبر وقدر مقدرك * صبر السجين السجن حده سياجه
والعافية تاجن على الراس يمتعك * غيرك مريضن عايشن في زجاجه
نصيت لك في الشعر رجلن يواجهك * والسوق نعرف سلعته في حراجه
والخاتمة حاسب وقدر مواردك * العمر فاني والحياة اندراجه

وسلامتكم....

تم تصغير الخط بعد إذن صاحب الموضوع وشكرا