مفاتيح الارزاق .... لابن جدلان

يالله ياحامل مفاتيح الارزاق
المعتني في رزق نفس خلقها

عن الخفايا ما على عينك رواق
واذنك عن الاسرار ماهي بصقها

اجعل لنفسي من غضب وجهك اعتاق
وبيديك معلاق الامور ووفقها

واغسل قلوب اهل التباغض والاشقاق
وهون مسالبها وريح شفقها

سبة مروجة النمايم بالاسواق
اللي ما يملى الناس غيض شلقها

خيل النزاهة من ورا الغايب سباق
وان قابله وهو عليها صفقها

وقام يتمذلق قدام وجهك تمذلاق
واليا نشد في جنب غيره لصقها

مطيته مطلاع تحدى وتنساق
وتركب عرو وان شد حمله وثقها

ومعمر روض التسالي له ارفاق
ترفع كباريها ويحفر نفقها

سبّاية الغرات قطّاعة الساق
اعراض خلق الله لاغابت هتكها

وعشّيق للروضة مغرم ومشتاق
بئس العشيق وبئس باللي عشقها

مايلتهم لا التفت الساق بالساق
وتقسم الارزاق والله فرقها

احد يقدم له حميم وغساق
واحد بروضة سلسبيل وغدقها

ما قاله القايل للأبواب طقاق
لو صكت ابواب العرب ما طرقها

منقاد للعالم مقانيص وسباق
ثارت شوازنها وهدت سلقها

اهديت باقة ورد من ضمن الابواق
لا اقول لأحد خذها ولا اقول ذقها

ودي بالانفس كلها اصحاب واصداق
ولا اخشى عقايبها ولا ارجي مذقها

والآدمي لولا المكارم والأخلاق
كالحنظلة من عرقها ليا ورقها


الشاعر / سعد بن جدلان رحمه الله