عطني ياهاب الريح من وقتك شوي

المشاركة الأصلية كتبت بواسطة الحمدان

عطني ياهاب الريح من وقتك شوي
وأسمع كلامي كان ما به كلوفـه

سخر جهودك في رضا الواحد الحي
والفرض لاتغفل من أول صفوفـه

لاتمنع الناصح ليا قال ياخـــي
خذ مايفيد وزايد الهرج طوفــه

لاتطرد المقفي ولاتشاور الــعي
قدام ياكلك الندم والحسوفـــه

ترى حكيم الشور ياخذ ويعطـي
نفسه من الراي الدناوي عيـوفه

ولاتقرب الشبهه ولاتخاوي السي
عليك باللي طيبات وصـــوفه

من رافق الطيب شرب صافي المي
ومن رافق الهافي جفا الما كفوفه

ولاتنكر المعروف لو أنه شـوي
من قدم المعروف رد معروفــه

وأدمح خطا الطيب لياصار مخطي
وأقبل معاذيره وقدر ظروفـــه

ولاتنهر المحتاج لاجاك مبــلي
خسارة في فعل خير مخلوفــه

وأطلق حجاجك لاأقبل الخاطر وحي
بشاشة الطيب كرامة ظيــوفه

ترى الكريم معان بالخير مرهـي
من يترك الماجوب جعله ذلوفـه

لاتقطع الرفقه ولو حبلها لــي
حبل الرفق من يفلته بـان خوفه

رجل بلا ربعه من الناس مجفي
لابد صكات الليالي تـــحوفه

واللي في عينه مايشوف البشر شي
ترى البشر في عيونها ماتشوفه

ومن عوده حظه على بارد الفـي
لابد لفحات السمايم تلوفــه

ومن ساقته نفسه على سكة الغي
صعب عليه ليا تمادى نكـوفـه

ترى الليالي تطوي أيامنا طــي
يالله بحسن الخاتمه والمروفـه


الشاعر.... مشخص الفهري

بصراحة حبيت القصيدة
الكلام كله زين استمتعت فعلا بقرائتها
شاعر حكيم
تسلم اخي الحمدان على حسن الاختيار فانت مبدع
ودمت بهذا العطاء المستمر
تحياتي لك