حتى العجايز يلبسن الفساتين

قصيده لشايب مغبون يقول :


حتى العجايز يلبسن الفساتين
الله أكبر يازمان العجايب

وتشقر الحاجب وتظلل العين
ولاعاد يملى عينها اليوم شايب

وجوالها آيفون وجالكسي أثنين
ومسويه قروب وفلة حبايب

وتجاكر الموضه وشغل المزايين
وعلى الدلع والزين تدفع ضرايب

وتاخذ ضمان وحافز وحالها زين
وتفك زنقات العرب والقرايب

وتقول عمري ماتعدى ثلاثين
وودي وودي لكن الحظ خايب

نست زمان الغربله والبعارين
وحوش الغنم وملوفحات الهبايب

واليوم تمرح في الفلل والبساتين
هذا زمنها يازمان الغرايب

عزي لعودٍ راح فيه البليتين
ماعاد يقبل دوس والسلك عايب

مقابل المسجد وباب الدكاكين
والمحكمه وقت النشب والطلايب

روح زمانه والزمن لاقلب شين
مرحوم ياعود السعد والحرايب

ماشافته عيني كتبته في بيتين
وأظن علمي ياهل الجود صايب