فوق هام السحب ( الشعر الشعبي) على متن القوافي

‏يا صاحبي لا تحبس أشواقك وعطني من غلاك
‏وأعطيك كل إللي ذخرته للسنين المقبله

‏خذ ماتبي من خبرتي فالحب والباقي فداك
‏وحافظ على أسرار المحبه وأصدق العشق أنبله

‏قلّ لي أحبك لين أشوف البرق يبرق من شفاك
‏وأقول أحبك لين ينبت لك في صدري سنبله

.....

‏كل يوم يمر واحلامي وراه تنادي
‏والظروف السود ترسم خطّها وتسنّه

‏ما كسبت من الغياب المُر غير عنادي
‏وما طمعت الا لبابٍ من وراه الجنّه

‏من هدى نفسه لرشده مؤمنٍ متهادي
‏مايهمّه شي دامه متّبِع للسِنّه

.....

‏تمرّ البال ياسيد الوجيه اللي تمرّ البال
‏تمرّ البال والساعة توقف لك دقايقها

‏توّقف لك دقايقها رضا نفس وقدر وأجلال
‏على لحظة لقا من بدّ هاللحظات سارقها

‏أحبك كثر ما ذعذع لك الغربي وعودك مال
‏أحبك كثر ما تكذب علي عينك وأصدقها

.....

‏فمان الله ياحب وقف ماكمل المشوار
‏عرفنا مفرق الدربين مايحتاج تكميله

‏بقت بس المعزه بيننا ماكن شي صار
‏وصرنا اغراب عقب الود يادنيا من انتي له

‏فمان الله ياقصه غرام واصبحت تذكار
‏صنعها الحب في لحظه ولاكمل تفاصيله

.....

الهوى دربه طويل وحرّ شمسك جايزٍ لي
‏كلما ازداد الشعور تقل لرضاك المسافة

‏لا تحاول يا بعد كل الأحبة خاطر اللي
‏ما تلدّد في ديارك غير من كثر الحسافة

‏إن رضيت أجيك كلي وإن زعلت أجيك كلي
‏أنت ذنبٍ لو يُعاد الوقت بأعيد اقترافه

.....

‏جيتــك امسي يا منــى الروح بالنور
وأقـول يا الغالي هـلا كيـــف حـالك

يالله عساك بخـير طيـــب ومسرور
ويالله عساني مانحـرم من وصالك

وعساك طول العمر بالخير مغمور
وعسى السعاده دايـم الدوم فالك

.....

‏أمرّ الدرب وأشوفه عتيم ومن عليه أشباح
‏وتِشرق لي دهاليز الطريق إلى ضحك سنّك
‏
‏مثل ما كنت أجيك من التعب والناس لاجل أرتاح
‏جعل ما آجي ما بين الناس أدوّر راحتي عنّك

.....

‏رفيق الدرب تذكرك الليال الموحشه بالخير
‏وعينٍ لا تناست شافتك وسط القمر صوره

‏تمّتع واضحك بوجهي كِبر واللي يصير يصير
‏ابيك تغيض حزني لين يطلع عن مدى طوره

‏يصبرني على بعض الشعور انّك لا زلت بخير
‏انا احوالي ليا منّك غديت بخير مستوره

.....

كيف اهمّش دور ذكراك مع مر السنين
‏والطواري مالها شغل غيرك من إلى

‏أنت مثل الدمعه اللي ورا جفن الحزين
‏ان ردعها ما سلى وان ذرفها ما سلى

.....

‏لاتعاند شوفنـــي عايـــــش وحيد
مامعي في الكـون معشوقً سواك

انت ساكـــن يا الغـلا بيـن الوريد
مااحـد قبلك وصـل في مستواك

يا رقيــق الطبـع يا الذوق الفريد
ليت تعـرف داخلـي معنى غلاك

انت عشق وانت حب وانت عيد
وانت نـــور الكون وانـواره معاك

.....