فوق هام السحب ( الشعر الشعبي) على متن القوافي

‏تغاضي يا عيوني والسنين قصار
‏ما دام الوقت لا أنصفني ولا أنصفته

‏أحب إللي مضالي وأكره التكرار
‏وأشوف إللي يخوفني ولا خفّته

‏غريب شعور والواقع غريب أطوار
‏كثر ما كنت راضي كثر ما عفته

‏ياكثر إللي تحاشيته يصير وصار
‏ويا كثر إللي تمنيته ولا شفته

.....

‏يوم الأيام السعيده علي متتاليه
‏حيّها مزين ظماها ومزين جوعها

‏راحت أيامٍ و مرّت علينا غاليه
‏عاد حنا في رجاها يعود رجوعها

‏تايهٍ في مجتمع ذا السنين التاليه
‏عالمٍ متغيرٍ سلمها و طبوعها

.....

اذكرك يا قلبي قبل عده سنين
‏تعشق تفاصيل الحياة وصخبها

‏عايش بدون قيود وبدون روتين
‏تمشي ورا احلامك وتنسى تعبها

‏هاذا وتوك ما وصلت الثلاثين
‏موتت شغفك الغامضه وش سببها

.....

‏تطري علي واشتاق لك واتمناك
‏والقاك حلمٍ من بعض ذكرياتي
‏
انا ادري اني صرت ماني بوياك
‏لكنك احلى حلم مر بحياتي


من عاشرك ماظنتي بيوم ينساك
‏مهما تغيب تكون لي مثل ذاتي
‏
واصعب مواقف دنيتي يوم فرقاك
‏فيها عرفت انك تساوي حياتي

.....

بين الضياع وبين كثرة شتاتي
محتاج انا لي برّ يا كثر امانه

يا كثر ما حاولت بـ محاولاتي
ووقتي بدى يكثر عليّ اللعانه

مليت من روتيني و أغنياتي
و مليت من قلبٍ تزايد حنانه

اطلع .. وانا والله مـ اعرفّ جهاتي
وارجع، وانا مدري وش ارجع عشانه

خايف يروح العمر دون امنياتي
واخاف حلمي ما يجي في مكانه

واخاف ما أخشع وازل بـ صلاتي
واخاف قلبي لا يخل اتزانه

واخاف اموت ولا احصل نجاتي
واخاف اضيع بـ لحظة الاستهانه

يارب وحدك عارفٍ في مماتي
ووحدك تعين الي طلب استعانه

تجعلني ابقى في ثباتي، ثباتي
واعوذ بك من ذل وقت وهوانه

وتغفر جميع ذنوبي وسيئاتي
ويارب، تجعلني اصون الامانه

.....

جف صوت الحروف وشح فكر الكلام
‏وانعقد حبل .. فوقه عبرة جانيه

‏كل ماقلت هانت بذكر الله .. وانام
‏ناخ ركب الجروح اللي لفت عانيه

‏كل ليلة بـ صدري .. مؤتمر لسلام
‏وينقصف ما يكمل بالفرح ثانيه

‏الطف الكذب قولة بـ أن حالي تمام
‏والمعارك بـ صدري طحن متفانيه

بين خابت ظنوني بين كثر الملام
ارجي الله جزانا ثمرة دانيه

كيف بقنع عزومي تستمر ل الامام
وانا حكمة حياتي فانيه فانيه

.....

‏اتركوني من النشده وبحث الخوافي
‏وابعدوني من الديره لـ دارً فسيحه

‏جعل مامر صدري مايمر السنافي
‏عفت شوف الحضور ومطرويً القريحه

‏ضايقً من فراق وضايقً من تجافي
‏اتقوى وانا حالي دنى من مطيحه

‏يكذب اللي يقول ان المفارق عوافي
‏لا يحس بشعور ولا يعرف النصيحه

.....

‏يفز الحنين من آخر الصمت والفقدان
‏وتهيج الجروح اللي عن الشِعر حابسها

‏فقدتك وفقدانك على وجه عمري بان
‏وانا اخترتك بـ معشب سنيني ويابسها

‏عيون ٍ روَت وجهك عمر ماملاها انسان
‏يغني لها الملح .. وترفرف نوارسها

‏ياكثرك بـ ذاكرتي تمر وتسيل أشجان
‏وتفاصيلك بـ كل الوجيه اتلمسها

‏تمر الحياه وليت الاقدار بالامكان
‏واعرف الليالي وش تخفي بواهسها

‏يا كيف اتجاوز ما مضى واقدر النسيان
‏ولك ضحكة ٍ في تربة البال غارسها

.....

‏تحاذف على راسي من البارحه لليوم
‏همومً مع هوج المراويح تومي به

‏انا من دموع العين والله ماحولي نوم
‏ماغير اسكب دموعي من الفجر لـ الغيبه

‏يا دمعي عداك اللوم والله ما حولك لوم
‏تصبر على موته وماجت به تجيبه

صديقي خذاه الموت والموعد المحتوم
وحزني على كبدي تراكت مشاهيبه

قبرته وصدري من خبر موته مزحوم
هذي والله الغيبه ليا قالو الغيبه

لو ان البكاء بيفيد ببكيه لين يقوم
خذته الليالي من يدي كيف بتجيبه

ياوجدي وياويلي وكبدي ومال القوم
على اللي خذاه الله وانا عاد ودي به

.....

‏البارحة مابين ذكرى وتذكار
‏عيا يطب النوم سود الجفوني

‏ياغايبي والشوق مخلوق من نار
‏ماهنت لو غيرك عليا يهوني

‏وشلون تتركني على عتبة الدار
‏وانت الوحيد اللي بكت له عيوني

‏اسألك في وجه الولي رب الابرار
‏رازق ضعيف الطير فوق الغصوني

‏ان كان باقي لي معزة ومقدار
‏عوود ترا شوفتك تشفي طعوني

.....