فوق هام السحب ( الشعر الشعبي) على متن القوافي

انا مثل البحر واللي يبي ينهي الحياة أنهيه
مثل من يحرق الدنيا ومن فيها وهو فيها

احبك وان تناسيتي غرامي وان تذكرتيه
عيونك موطني وارخي شراعي في موانيها

يروح العمر والا ما يروح العمر وش تاليه
حياتي لحظةٍ من عاد من عقبك بيحييها

.....

اطلب المولى ولا تطلب سواه
وارفع الشكوى بلا حبرُ ورَق

لا وسيط وموعد يحدد لقاه
لا سفر لا هم لا جهد وأرَق

جلّ شانه ما يخيب من نصاه
ما يرد اللي على بابه طرَق

خاب حظ اللي يدور من سواه
رزق مابه رزق من يد السّرَق

ذل نفسه بين ذي جاهٍ وجاه
كن وجهه خبز تنور احترَق

لو عطّيْ مليون والله ما عطاه
ما اهتنى به يتلفه ولا انسرَق

احمد الله واشكره واطلب رضاه
تلقى عز النفس في قلبك شرَق

وانت ساجد بين ايدينه ف الصلاه
خاشع ٍمن قلب للطاعات رَق

أساله حاجتك واكثر من رجاه
واعلم ان الله على عبده أرَق

من غني متغطرسٍ جر العباه
حكمته الله خلق والله فرَق

.....

ادري ان اللي ضحك لي مابكالي
ماتبي يا مسندي فهم وحذاقه

بيّض الله وجه صلفات الليالي
علمتني ويش مفهوم الصداقه

ايه والحر يتعلا فوق عالي
ما يعيقه شي لا هد انطلاقه

ماكره يا مسندي روس الطوالي
ولا عليه من الغراب ولا نعاقه

علّم اللي وده يزيد انفعالي
المنافق بان للعالم نفاقه

طاح من عيني بعد ما كان غالي
مثل تمثال العراقي في عراقه

.....

والله بخيالي ضحكتك واضحة زين
يا بنت والله الزين ما هو بخافي

ضحكت ثغر والا ابتسامة شفاتين
احلى ملامح شخص لا صرت غافي

ادري تزعلني وهجرك طواعين
ليه التغلي والزعل والتجافي

زارع عنادك مثل زرع البساتين
وانا ودادي لك على طول صافي

دايم جنون الحب مسكه رياحين
الا انت زدت وزود بالطيب ظافي

لو كنت صحراء حر محدن لك يبين
انا الوحيد اللي ابى امشيك حافي

امشيك من اقصاك لا ادناك ذلحين
ممشى نمر لامن فريسته شافي

ابفترسك بناظري يا اكمل الزين
وابا اتعشى فيك والضو طافي

ما ابغى رموشي تبتعد عنك لو حين
خوفي يصير لي شي منك خرافي

خوفي يفز القلب واصير مسكين
شخصن ابليا روح والقلب مافي

روحي معك اهديتها قبل عامين
جتك الهدية من حبيبك عوافي

والحين قلبي مابه النبض لك لين
تنشد عن المجروح في علم لافي

ادري بشوفك يااريش العين بالعين
ادري الزعل مايرد شخصن يوافي

وادري علي تحن حن الشفاتين
هي للتلاقي بالكلام المصافي

ناطرك خلك ياحبيبي الى الحين
حتى الحياة اللي بدونك تعافي

.....

أوجعني البعد لا تبكي ولا أبكي لك
فقدك ضرب بي بحوراً مالها ساحل

أيسّت من شوفك وطاري مواصيلك
أواه ليت الدروب تعود بالراحل

.....

الله ولا الهاجس اللي ما يريحني
اسهر عيوني وعناني وعنيته

احاول اخفيه مير الحزن يفضحني
متمركز بالحشى كل الحشى بيته

ياللي تعاتب غموضي لا توضحني
ما باقي في الخفوق الا تناهيته

اصافح الهم قبل انه يصافحني
واحب خشمه واردد في الخفى ليته

ليته قبل لاتزل خطاي ينصحني
ولا يريّح خفوقي من عفاريته

والغالي اللي عليه الشوق ذابحني
اقفى به الوقت ماجاني ولاجيته

ياسيد الغيد قبل اقول لك بحني
بخبرك عن كلام عنك خفيته

تدري وش اكبر خطاي الله يسامحني
اقفايتي عنك وانت اللي تمنيته

وهذا هو اللي معذبني وجارحني
اقول ابنساه وانا ما تناسيته

.....

رغبت القصيدة رغبة الطير للتحليق
سماي اصبعين وبينها جرح مسباقي

تعودت اموت بصدق وارحل بلا تعليق
كفاني احس بلذة الموت في اوراقي

ولا احط نفسي وثن يشرب التصفيق
على شان يدخل برزخ النور لأعماقي

مهو لازم اقطع دابر الشك بالتصديق
ولاهو ضروري تعكس اشعاري اخلاقي

.....

صباح العيد لا مر الأماكن
تسيل الشمس من فوق الثرى ضو

صباح ثنين زعلانين لكن
صحو بدري من الشوق وتراضو

.....

انا اللي عاهدت يمنى المحبه والوفى يمناه
متى نوفي واصافح ناس من طبعي ومن لوني

وانا اللي ترسم اقلام الاوادم ضحكته وبكاه
عسى تغريهم شفاهي ولايدرون بعيوني

قصيدي اكتبه واخفيه وعيون الصقر تقراه
ويقرون العصافير التعب والجوع وجنوني

.....

لا تسأليني متى كل ما بغيتي تجين
الحب مابه متى كل العمر موعده

حبيبتي لا يهمك وقت .. لا تستحين
انا رميت الدقايق عندك مقيده

هبي وانا بآتمايلك غرام وحنين
لحنك من اليوم للبارح وانا آردده

.....