ديوان شعراء السعودية في العصر الحديث (متجدد)☘️☘️

عيون الهنوفه


اخلفتني نظرة عيون الهنوفه

خلفة الصقار لا شاف الحباري

واقت النظره على قلبي تشوفه

واشعل بقلبي كما البرّاق ساري

صد عني طاغي النظره مروفه

ظالمن قلبي وهو بالظلم داري

ياحبيبي صدتك عني حسوفه

ارسل سهوم الذوابح لاتداري

ارسل رماح الهوا وارسل سيوفه

يشتهيك القلب في كل الطواري

عيني لحسن الذي غيرك عيوفه

في عيوني غيرك من الحسن عاري


خالد الفيصل

سافر


سافر

سافر عسى ربي يحرسك وياقاك

هذا البخت عزّاه وش في يديني

يا شين باكر يا حبيبي بليّاك

لا جاء وعدك اللي بوقته تجيني

لي قمت أدوج في مداهيل ما طاك

يا ما جرى بشهار بينك وبيني

هذا وهو توّك تطري بممشاك

وشلون لي قفيت يا نور عيني

يا شيب عينك يا هوى البال واشقاك

كانك مثل ما أبيك يااسمر تبيني


خالد الفيصل

يا طارد


يا طارد اللي راح خله وملوه

ما يستقيم الظل لا عوج عوده

ولا ينفع الندمان قولة حولاه

جحر لدغ يمناك لا لا تعوده

مد النظر في خلق ربي تمعناه

إلى انتقص من حال حال يزوده

الله جعل للمبتلي داه ودواه

وكل على عزمات قلبه حدوده


خالد الفيصل

فارس الأشعار
فارس الأشعار
يا فارس الأشعار مني تحيه
مع ريشتي حاولت اصوّر معانيك
مزجتها بالوان روحي هديه
ياليتني اخذ باقي العمر واهديك
يا ما خذينا من حنانك عطيه
وش عندنا في مثل هذا اليوم نعطيك
خالد الفيصل

المعاناة


يا ليل خبّرني عن امر المعاناةْ

هي من صميم الذّات والاّ اجنبيّهْ

هي هاجسٍ يسهرْ عيوني ولا باتْ

أو خفقةٍ تجمح بقلبي عصيّهْ

أو صرخةٍ تمرّدت فوق الاصْواتْ

أو ونّةٍ وسط الضّماير خفيّهْ

أو عبرةٍ تعلّقت بين نظراتْ

أو الدّموع اللّي تسابق هميّهْ

أعاني السّاعه واعاني مسافاتْ

واعاني رْياح الزّمان العتيّهْ

واصوّرْ معاناتي حروف وابياتْ

يلْقَى بها راعي الولَعْ جاذبيّهْ

ولاني بْندمانٍ علَى كل ما فاتْ

أخذتْ من حلو الزّمان ورديّهْ

هذي حياتي عشتها كيفما جاتْ

آخذْ من ايّامي واردّ العطيّهْ


خالد الفيصل

الجرحين


أنا فيني من الأيام جرحينن على الخفاق

من الاقصين جرح وجرحن من ربعي الادنيني

أقوم بجرح لكن ثاني الجرحين ساق وعاق

مشى سمه مع عرقي ويبست منه كفّيني

يولّعني وَهج ناره وفي فكري كما البرّاق

عواصيفن تودّعني وعاصوف يلاقيني

مثل ريشه نقلها ريح مع شوك وفي مضياق

يمزع شوكها جنبي وبالرجلين يدميني

ألَمها جضّ به قلبي ودخّن بالصّدر حرّاق

تفجّر كنّه البركان في سمعي وفي عيني

يعاقبني زماني يوم صدري بالعنا ما ضاق

أشيل الحمل ما تَعبت من الوعرات رجليني

أعرف أنه قدر عمري واعرف أن الزمن سرّاق

وهذا ما كتبه الله وأنا المكتوب يرضيني


خالد الفيصل

طالت القامات


هل خير .. وحل خير .. وعم خير

ويسر الله كل امر في عسير

وامطرت سحابة الحب العظيم

والهوى في كل قلب له غدير

وغنت الاطيار واهتز الشجر

والزهر يفوح من عطره عبير

وكل وادي سال بجموع البشر

حادي الاشواق داعيها تسير

تضحك الفرحة على وجه البلاد

وكل قلب كاد من فرحه يطير

وارتفع في كل كف سيف عز

وطالت القامات باليوم الكبير

ياولي العهد شرفت الجنوب

والرجال اللي تسابق بالمسير

من تهايمها ومن كل السراة

ومن سهلها جاك سيل له هدير

يهتفون بإسمكم حب وولا

وينذرون عداك بالسيف الشطير

قادهم عهد لكم منهم قديم

يرخصون الروح لى صاح النذير

التلاحم والثقة والانسجام

بين شعب وقادته ماله نظير

بين بارود البنادق والسيوف

بالمحبة عانق الشعب الامير

عرضة فيها الوطن لحن وقصيد

إنتشى الشايب لها قبل الصغير

كل ناس يفرقون بميزه

والسعودي فرق ميزاته كثير

الشهامة .. والشجاعة .. والكرم

والوفا .. والحب .. والدين الغزير


خالد الفيصل

ظلمتين


الله ياهم نقلته لحالي

مافي يدي حيله ولا بالقدم حيل

أجحد واجنّب مشكلي كل غالي

واكناه عن عدواني الّلي مغاليل

في ظلمتين همومها والليالي

أكشف ظلام الهمّ يا كاشف الليل


خالد الفيصل

لواجب اكبر


لواجب اكبر يا بوخالد علينا

لو بعت أنا روحي فلا ظني اوفيه

يا اللي لطلاب المعونه عوينا

كريم نفس وغالي المال تصخيه

لى جاك شكاي الهموم الحزينا

تشيل عنه الهم ويروح ناسيه

انت الذي لك كل قلب يلينا

يجيك من جرحه عطيب وتبريه

وأنت الأبو وأنت الأخو والظنينا

وانت الصديق اللي نحبه ونغليه

ان جاز طرفك يا سنادي جزينا

ما تهتني عيني وعينك تقاسيه

لا تشتكي يا شيخ خل الونينا

واللي تبي لو كان بالروح نشريه

لا والله الا يا بو خالد مشينا

لوازمي تبقى ولوازمك نقضيه


خالد الفيصل

يا مرحبا بك ياثمانين عمري


يا مرحبا بك ياثمانين عمري


لو ما هقيت انّي اشوفك وانا حَيْ
تَنَاَسَلَتْ شَعرات الايام تجري


وابيضَّتْ السّودا على ضامي الرَّي
الشَّمس تمضي وانْجُم الليل تسري


وكلْ شيٍ صار في عيني شوَي
أبحث عن اللي يرفَع الرّاس واشري


ما شْغَلْت نفسي بالمَلذّات والغَي
أشْغَلتْ وقتي واستفَزْيت عصري


أصَحّي الغفوات بالشمس والفَي
اغضي .. ولكن ما تَناقَصْتْ قدري


وأسْمَحْ .. ولكن ما تنازَلت عن شي
رُمْتْ المراَجلْ طفلْ لكنّي ادري


إنّي أَبَطْوي كلّ عَسْراتها طَي
دَرَسْتْ علم الفكر والعزّ بدري


في مدرسة جدّي وابوي وعَمامي
واليوم لو ثَقْلَتْ بي الرّجِل .. بُصْري


لي عزمٍ امشي به على كلْ ما في
أَمَاوِجْ المعنى على بحر شعري


والْوي قوافيها على شْراعها لَي
هيْ سَلْوِتي بالعمرْ إذا ضاق صدري


أداوي جروحي قَبلْ حامي الكَي

خالد الفيصل