رحلت يابدر ولم ترحل مآثرك

احاكي الجدران عن وصف غرفه
ماتشبه الجدران ويطول وصفي

وتملني الجدران واظهر لشرفه
تحت السما واسكر الباب خلفي

ريحٍ تهب وتسكن العظم رجفه
وتموت ريح وتسكن اوراق نزفي

ياطاري الغدران والعمر رشفه
مع قلها ياليتها يوم تصفي

الحب واجد مير الاقدار صلفه
والأرض واجد لكن الحلم منفى

واللي اعرفه راح ماعاد اعرفه
ولاظن يذكرني الى أقبلت مقفي

ماهو حبيبي مورد القلب حتفه
ولا هو حبيبي يفرح بوقت ضعفي

مر ثمر هالليل وأمر قطفه
يالحنظل اللي قمت اذوقه بكفي

متى الشوارع تجمع اثنين صدفه
لا صار شباك المواعيد مجفي

يابنت تو الليل ماراح نصفه
وياليل بعض اللي مضى منك يكفي


الأمير بدر بن عبدالمحسن

‏تبكـي عليك اوراق شعـرك وترثيـك
‏حتـي الحبـر ينزف ويبكـي غيابـك

‏مـات الشـعر فـي موتت معاليك
‏عظـم الله اجـرنا فـي جنـابـك

‏يابدر لو غبـت ما غـاب طاريـك
‏نبقي نحبك ونذكرك في ترابك

...

على طريقة البدر الذي لا يغيب أقول :

لا غاب نور البدر في عتمة الليل
اشوف نور البدر في جوف صدري

أنا حزين الأمس واليوم بالحيل
لا جف دمع العين ما جف حبري

واقف مع المعنى نعيد التفاصيل
يقول مات البدر يا كسر ظهري !


أصّبر المعنى بـذكر المـواويل
و اصيح بأعلى صوت يا بدر بدري

بدري رحلت وعاد في لك مراسيل
قلت وأغاني من لظى حرف سرّي .

من أروع وأعذب قصائد العتاب للبدر.

‏جفا الكلام .. الكلام وجفت أشفاهي
يا مورق الهمس صوتك لا يناجيني

يا زين والله حسافة وردك الزاهي
ينبت على ما تهدم من بساتيني

جمع الرمل في ضلوعك غرامْ
واطوِ زندك على ضلعانها

عانق الرمث وعروق الثمامْ
واِصل خدك على صوانها

أرضك اللي بها البيت الحرامْ
أشرق النور من وديانها

ربعت بالمحبة والسلامْ
واعشبت بالفخر صمّانها

الأمير بدر بن عبدالمحسن

قالت قصيدك ليل .. سودٍ معانيه
رويانةٍ بالدمع ... وامدادها دم

الى متى يا شاعر الهم تخفيه
والى متى .. تحنى ضلوعك على هم

قلت البكا .. صعبٍ عليه وأنا بيه
لا واهني اللي بكى وما تندم

لي عبرةٍ يلعب بها الحزن والتيه
ولي صرخةٍ .. واتعبت ابلقى لها فم

لا ما كتبت الشعر .. لحدٍ بسليه
ولانيب مداحٍ .. ولا باترنم

احساس لابيعه ولانيب شاريه
مرٍ يجي شهدٍ ومرات علقم

الى لمحتي دم جوفي .. افـ خليه
علىالورق .. لا صار روحك تالم

قلت الشعر يوم إن لي .. راحةٍ فيه
وحزين أنا .. إلى متى .. الله يعلم


الأمير بدر بن عبدالمحسن

يا عاذلي .. ما تشوف العين مشتاقة
لولا الحيا جاوبتك بدمعها الصافي

عطني جلد .. كان تنخاني على فراقه
ودي الي من تركته ما أشبح خلافي

لاح الجبين .. وجذبني نوض براقه
حيثه ربيعي .. وورد الخد مصيافي

والغصن لولا المطر ما أخضرت أوراقه
يا كيف عشب الوسم يترك وينعافي


الأمير بدر بن عبدالمحسن

لا شاري عقدِ ولا مهدي سوار
لا تلحقي نفسك هموم وحسايف

تريثيي يا قرة العين مقدار
ما تشرب عروق القصيد الوصايف

لا من قدحت الشعر وشبيت لك نار
نارِ على روس الهضاب النوايف

يطرب لها الساري ويسري بها الطار
وتزهر بها عقب المحول الشفايف

باهديك أنا عمر ولاكل الأعمار
يفنى القلم قبله وتفنى الصحايف

قصيدة تولد ورى باب وجدار
سر الضلوع المرهفات النحايف

وإلى أصبحت طارت على متن الأسفار
وغنت بها قبل النفود الصحايف

غيبي وشيبي وإتركي كل ما صار
يبقى جمالك في قصيدي طرايف

وخلي الكواكب من سنا نورك تغار
ولا تلحقي نفسك هموم وحسايف


الأمير بدر بن عبدالمحسن

يا صاحبي .. والليالي سود
يا صاحبي .. والزمن صافي

اللي إلى احتجت له موجود
واللي إلى من وعد يافي

ما هو على المرجلة محدود
تقول مكتوف بكتافي

ما جور ياللي رقيت إسنود
عرض الجبل .. وانيٍ حافي

يوم الردى مسكنه فـ .. لحود
مسكنك في راس مشرافي

والله لوفي التحرص زود
كان العمر ما نقص .. وافي

وليت الرخا لا اجتمع والجود
تقاسمه شهم .. وسنافي

الأمير بدر بن عبدالمحسن

عيونك لاتوريها

لغيري لاتوريها

عيونك لي ولو أقدر

عيونك عنك أداريها

أنا لو بعت نظراتك

ابيع العمر واشريها

عيون الليل انا بالحيل

أحب أسهر لياليها

وأحب أبكي

وهي تبكي
وأفرح للفرح فيها

حبيبي لو ضمنت اليوم

أعيش الشك في باكر

يجي مستقبل الايام

يغير في هوى الحاضر

يغيرك الزمن بعدي

تعلم طبعه الغادر

أخاف عيون مايدرون

وش اللي يجرح الخاطر

وعيونك آه .. لو يدرون

حياتي فيها للآخر

عيونك لاتوريها

لغيري ..لاتوريها

الأمير بدر بن عبدالمحسن