فوق هام السحب ( الشعر الشعبي) على متن القوافي

الله اكبر ياحمام من صلاة العصر ناح
وانشغل قلبي معاه لاجزاه الله بخير

الله اكبر يوم ناض طار ورفرف بالجناح
ودي اتبع ساقة الراعبي وازريت اطير

ودي اتبع ساقته بالمقيل وبالمراح
شوف عيني بين هاك المباني يستدير

واهنيك بالمــسا ياحمام وبالصـباح
كل يوم تشاهد الترف ملهوف الضمير

ياحمام الورق قل للغضي سيد المــــــلاح
عن ذهابي قل لزين الوصايف يستخير

وصف خده بارق الوسم من منـــشاه لاح
يوم شعشع زاد نور البلد عقب الاخير

والعيون عيون خشف(ن)تربى بالبيــــــاح
كل ما هبت نسيم الهبايب يستذير

يامريح القلب قلب المولع ما اتســـــتراح
تقل يجذب للهوى في سلوك من حرير

اتضيم واتهضم وانا مالي صــــــــــــلاح
واتقلب طول ليلي مثل وصف الكسير

ياهلي لولا الهوى كان اطنب بالصــــياح
عقب فرقا الترف ماادري وش الدنيا تصير

كن بعيونه لراع الهوى زرق الرمـــــاح
هو خطر واللي تولع معه قلبه خطير




أحمد الناصر الشايع

سالفه مشهوره ..صارت في ديوان الأمير ابن رشيـد..

وهي سالفه علوش بن ظويهر..من قبيله عنزه

هذا الله يسلمكم علوش كان في مضافه بن رشيد ..وفي احد الايام..وكان الديوان مليان..من الرجاجيل والضيوف..وهو يقول بن رشيد صاحب الديوان..

القهوه..وهم يقومون الصبيان يدورون على الضيوف..ويقهونهم..وش وي وهو يوصل الدور لابن ظويهر..ويومه شرب الفنجال وهو ما يعجبه..وهو يكبه وراه..

في اللحظه هذي شافه بن رشيـد وماعجبه فعل بن ظويهر..وهو يقول له..

وش نوحك سفيـت الفنجال ياعلوش يعني وراك كبيت الفنجال..:

قال ..ابد طال عمرك مالي نظر في القهوه اليوم..طبعا هالكلام ما اقنع الشيـخ..قال له ابداً انت لك يومين عندنا..وتشرب من قهوتنا وش نوحك اليوم..

والمهم وهو يضغط عليه بالكلام..الين ماقاله علوش..ابد طال عمرك بس قهوتك صايده اليوم..قال بن رشيد..وش يعني صايده..وهو يلتفت على اللي جنبه
وهو يسألهم وش رايكم بالقهوه..وهم يقولون ابد طال عمرك ماذقنا اطيب من قهوتك


المهم..وهو يسأله بن رشيد وش هي صايده قهوتي..قال ابو عوف طال عمرك..ابو عوف هذا اكبر من النمله ..ويسمونه القعيس بعد ولا مختار الصحاح

طبعا الامير ما عطاه بال ولا صدقه..ويومه علوش شاف السالفه كذا وهو يقوم
ويقول رقبتي لك رهينه طال عمرك اذا ماكانت القهوه صايده ابو عوف..

وهم يروحون يكبون الخمره الدله الكبيره اللي مسوين فيها القهوه..

وهم يحصلون فيها ابو عوف..وهو يستغرب بن رشيد قال وشلون عرفت..

وهو يقول علوش..ابد طال عمرك القهوه صار فيها طعم حموضه من ابو عوف..

والله وهو يروح بن رشيد وهو يسأل الصبيان اللي عنده كم بقى له بن ظويهر في المضافه عندنا..وهم يقولون له يوم والا يومين..وهو يقول لهم لا تخلونه يمشي..ابيه..

المهم وهو يروح الامير ويسأل اللي عنده ويقولهم وش اللي لو خلطناه في القهوه مايبين؟؟؟ وهم يقولون له ورق العرفج..وهو يأمرهم انهم يحطونه في القهوه اللي يتقهوى منها علوش ويومه تقهوى وهو يسأله بن رشيد ها ياعلوش..
تتطعم بقهوتنا شين..وهو يقول ايه طال عمرك القهوه صايده ورق عرفج هذا والله النشبه:

ويروح بن رشيد ويسأل ربعه نبي شئ ما يعرفه..المهم وهو يقولهم يحمسون فنجال محروق وفنجال ني..ويخلطونهم ويسوون القهوه منها..وهم يسألونه وهو يقولهم بها طعم نياه وطعم حراق..


المهم وهم يفكرون بشئ مايكشفه..وهم يحطون الراك..قشر المسواك..وهو يسأله بن رشيد ها يا علوش تطعم بقهوتنا شئ..وهو يقوله ايه طال عمرك..بها طعم مسواك..


وهو يقوله بن رشيـد تدري ياعلوش..كل ماشفت الهلال مثل الباكوره في القبله وجهك واشوف يعني تعال عندي.. وترى كل ماينوب قهوتك ومعاميلك علينا ..


وكان من التواجديـن محمد الذويبي من حرب وهو يقول هالقصيده...

تستاهل الكيف الحمر يابن وايل
انت الذي تستاهل الكيف كله

اللي نقدته وسط ديوان حايل
لولاك ياعلوش محدن فطن له

بدلال من يقعد صغا كل عايل
الضيغمي ريف الايدين المقله

الضيغمي مردي المهار الاصايل
يامنقطع في ساقته من سجله

يابن ظويهر مابها قول قايل
تستاهل الفنجال لا جا محله

ياناقد الفاقد بحكم الدلايل
ياريف هجنٍ والمزاهب مقله

ربعك بني وايل مذاد القبايل
اهل الجموع الراسيه والمظله

زبن الدخيل اللي تواطاه طايل
الجمع دونه والرمك منكهله

ياسعد عينك بالطرب يا حمامه
ياللي على خضر الجرايد تغنين

عزي لعينك وان درى بك سلامه
خلاك مثلي يا الحمامه تونين

كسر عظامي كسر الله عظامه
شوفي مظارب شوحطه بالحجابين

يقول انه مروحينه عمامه
الله يغرب ديرته اصفر العين

وان كان ودك بالطرب والسلامه
عليك بالفرعه ديار الوداعين

تنحري ربعن تفك الجهامه
فكاكة القالات بالعسر واللين

دخيلهم ما احدٍ على الحق ظامه
ولو هو فقير الحال ما يلحقه دين




مويضي البرازية المطيرية

‏ياالله برزقً مادرى عنه مغتاب
ولاحال من دونه خبيث السريره

يقضي لوازمنا ويفتح لنا الباب
على الحياه المزهره والمنيره

وينسي المحتاج موال الاتعاب
ويقف مواقيف البطل في المغيره

عبدالله بن حصين

‏ليت الردي يحبس بسجن الحكومه
من شان ماتكثر علينا ( الهملّط )

تلقى العفن في كل حفل وعزومه
وعش الطيور بمجلسه و(المقلط )

كم منصبن عالي وراعيه بومه
لاتنصدم بالناس حزمة ( جحلط )

اللي مايقضي لابن عمه لزومه
وشهوله بصدر المجالس.( يقلط )

زويد الهويملي

‏يا كثر ما نعطي ..ولا ننتظر رد
وننسى عطايانا .. ليا من عطينا

قلوبنا : ما تعرف الحقد ، والصد
ونطيب فـ اللي .. ما يطيبون فينا

ونحبّ لكن فـ المحبّة .. لنا : حد !
لا وصلّت .. حدّ الكرامة .. مشينا

وان ضاقت الأيام .. نوقف لها ند
نضحك لها من قبل تضحك علينا.

عبادي الزهراني

‏يالله بذكرٍ مجيد وطول عمرٍ مديد
واعوذ بك من عثا الطرقه ودرك الشقا

واقسم لي الخير والخيره وعقلٍ رشيد
واغفرلي اللي مضى لـ العمر واللي بقا

عبدك واناجيك يالاقرب لـ حبل الوريد
من ضنك دنيا الفنا لـ جنان دار البقا

انا من اللي خطاياهم تبيد الحديد
وانت اكرم الاكرمين وهقوة اللي هقا

‏طبـع*الـردي*مايحـسـن*الـظـن*فالـنـاس
‏لانـــه*يـحـسـب*الـنــاس*مـثـلــه*رديــــه

‏ولـيـا*سـمـع*لــه*كلـمـةٍ*جــاه*وســـواس
‏قــال*انــت*تقصـدنـي*وهـرجـتـك*فـيــه

‏قـلـه*عـســاك*ابـخـيـر*مـاجــور*لابـــاس
‏انــتـــه*مــريـــض*وعــلــتــك*بـاطـنــيــه

‏ فهيد الرويس

‏لا صرت وافي خصال وراعي مروه
‏وعندك فراسه تميز طيّبها الجاوي
‏
‏عليك باللي صفا جوك. على جوه
‏طبٍّ لجرح. الخوي. يرفاه ويداوي
‏
‏اعرف صفات الخويٍّ ومقدّر الخوه
‏لاتنخدع في زمان يخلف الراوي

‏ابن عامر البدارين

‏من بغى فزعة رفيقه في نهار الشده
لا يقصر في لزومه لا بداله حاجه

من حفظ قدر الرجال الرجال تعده
لاوطاه الوقت يبشرمايضيق حجاجه

الوفاء عند العرب ..عودٍ يذعذع نده
باقيٍ دام الجمايل. نارها وهاجه

مع هل المعروف كفك بالجمايل مده
بالوفاءوطيب العلوم الغانمه ومواجه

ضيف الله أباالعون