ديوان شعراء السعودية في العصر الحديث (متجدد)☘️☘️

وضح النياق

وين هالغيبه عسى ماهي إفراق
ليه تبخل بالمجي خلّك كريم
خابر ان الجرح لا صابه حراق
ما يفيده طبّ والله العظيم
ينشدوني وين من رمشه دقاق؟
قلت مدري ذاك خبري به قديم
الغلا راعيه له قلبن رقاق
لو جفيته صارت ضلوعه هشيم
لو زعل لو شال غيضه واستضاق
ما يخرّبها وجرحه بالصميم
ادمح الزلاّت زلاّت الرفاق
خصّ لا من صار راعيها حشيم
واكره الخوّان كرهي للعراق
واعشق الوافين عشقي للقصيم
عند اهلها غاليه وضح النياق
وانت عندي يمكن اغلا يا وسيم
ان بغيت افراقنا هاك الفراق
وش نبي بالحب دام الحب ضيم
متعب التركي

مشكور

مشكور يا بايع مشاعرك مشكور
العام ذنب وهالسنه ذنب ثاني
وش عاد اقول ولا بقى شي مستور
ما طعتني يوم ابتسم لي زماني
لا تعتذر لو خاطري منك مكسور
لا تفتكرني دام قلبك نساني
لا لا تقول ان الليالي لها دور
شف من هو اللي كان فينا أناني
مدري تصنعت الغلا زور في زور
مدري انا اللي حيل كنت متفاني
مثل العما ما تنفعه طلعة النور
النور بعيون العما ما يباني
عندي خبر لو جاك من يمي قصور
لأقول انا مخطي وربي جزاني
لو شفتني قاسي عليك انت معذور
شفني من أول جرح لا زلت أعاني
انا بشر مثلك لي احساس وشعور
واغتاظ لا مس الكلام بكياني
حتى وانا في قمة الغيظ مقهور
بعض الحكي عيا يقوله لساني
ابقولها لو قلت لي صابك غرور
ما فيه احد ياخذ بقلبك مكاني
العام قلبي فيك هايم ومجبور
العام لا مني جفيتك عصاني
واليوم حبك في حناياه مقبور
لو ما دعيته للمفارق دعاني
ذاك الهوى ما عاد لك فيه مقدور
ابعد من ايام الرشي والسواني
ما دمت راضي عن عذابي ومسرور
ملعون ابو قلب ٍ عليك يحداني
متعب التركي

البارحه

البارحه مدري وش اللي خذاني
يوم اجنبو عني من الضيقه اشملت
جيت اتكلم بس عيا لساني
ماكني الا مرتكب ذنب واخملت
الله يسامح من ذكرت ونساني
وانا ادري اني لاذكرته تجملت
عانيت وادري كل طيب يعاني
وعلى حساب طعوني الخضر جاملت
ياما خذو مني ولاحدٍ عطاني
من طيبتي في حق نفسي تساهلت
عزاي لامنه تجهم زماني
يممت وجهي للكريم وتوسلت
واللي يبي قربي وبعدي لقاني
امشي على وضح النقا ماتختلت
مرات احس انك معي شخص ثاني
ومرات احس انك حبيبي ومازلت
لاتفرح انك دجت بين المحاني
لو ماتخون الذاكره ماتسللت
عشان ماضيك الجميل وعشاني
حاول تشيل من الوفاء ربع ماشلت
متعب التركي

نهار الوداع
اخر اللي سمعته في نهار الوداع
دقت القلب مدري صوت عجل الخطاوي
نايف الطول وش سوابي الانقطاع
صار بين الضلوع القلب كنه فداوي
بيني وبين ضحكات السعاده نزاع
كني اللي قضى عمره طريدن جلاوي
لا تلوم الذي سوى لك المستطاع
خف من الله وخل جروحنا بالتساوي
عن هذيك النواعس ليه شلت القناع
الحيا وين يلي طول عمرك حياوي
كن خدك الطاهر بروقوشعاع
اثرها رحمةن للناس بعض الغشاوي
وش يفيدك عذابي ياغريب الطباع
ليه دايم على الملتاع سيلك نحاوي
امتلي غيض وازعل يوم وارجع بساع
راعي الجرح يستحمل عذاب المداوي
غالطوني وقالوا ليش هالاندفاع
ادوخوني عليك مكثرين الحكاوي
عذربوك بوجودي بالجفا والخداع
فيك حلو الوصايف صوروها مساوي
التزمت السكوت ورأيهم فيك ضياع
لين قالوا متعب على البعد ناوي
ميت القلب عرضت الغلا للضياع
والله اني على قطع الرجا بك مراوي
ماتغيرت لين انك لويت الذراع
تحسب اني على الهجران ماني بقاوي
لوتقول انت ماعقب الفراق اجتماع
عندي اليوم كل اللي تقول متساوي
او يقولون صار يخاف قلب الشجاع
من هك الليله وبيت القصيد امتهاوي
بين شقر الجدايل والعيون الوساع
اذكر اني فقدت القلب في هالحراوي
متعب التركي

توديع الاحباب

توديع الاحباب مثل الموت له سكره
أدمى جروحي وشق الصدر منيّا
والقلب طيرن اضلوع الادمي وكره
لاشاقه الطَّلع لاسَلَّم ولا حيّا
مصير الاحزان تنساني وتفتكره
ماكل الايام بيض وسمحتِ محيّا
قل غيرها منْت لامجبر ولا مُكره
لاصار ماهو غلا مابيلك احميّا
لو في يدي شي ماقلت الوعد بكرة
حزَّمت حدب الضلوع وقلتلك هيّا
لو كل غالي يجي دايم علي ذكره
ما صرت اشوفك هناك وحبك هنيّا
ياليتني لا بغيت اكره قدرت اكره
ما كان قلبي اليا جيت اكرهك عيّا
ما دامك مْعِيِّف رح لكن على فكرة
ما قلتلى ليه دمعك سال منَّيّا
متعب التركي

عطرها صلف

ذكراك لاهبت يجي عطرها صلف
واستنشقه بالصدر مثل الخزامى
إي والله إن غيابها مكلف كلف
إي والله ان عروق قلبي توامى
رمش النواعس والحجاجين والزلف
ياماخذن قبلي قلوب النشامى
أمضى من المصقول واسبق من الشلف
سهم الهوى لوكنت عنه اتعامى
لا يخدعك صبري على الجرح ماخلف
هالشعر غير جروح قلبي تدامى
لي خاطر بينه وبين الشقا حلف
ياماعثت فيه المقادير ياما
من عاش هالدنيا بلا صاحب وولف
عزالله إنه عاش عيشت يتامى
خل السوالف والمشاريه والحلف
مبطي وأنا على الجروح اتسامى
قلبن يضيق بذكريات الهوى جلف
وقلبي مثل جرد القفار يترامى
متعب التركي

ماقلت لي شي..!



ماقلت لي شي وش خليت ماقلته


اسكت وخل الكلام لجرحي الدامى
لوغيرك اللي يسولف ماتحمّلته


لكن على شان عينك هانت ألامى
للحب مفهوم عمرك ماتخيلته


ماأظن يستوعبه تفكيرك السامى
هذا الفراق الطويل وهذي أسئلته


هذا حصاد السنين وهذي أيامى
ياما وياما عليك البال طولته


والعمرعدى وأنا عايش على أوهامي
حتى طريق الفراق اللي تساهلته


لقيته أصعب على نفسي من أقدامى
اصبرلي شوي لودمي تثاقلته


بحاول أستوعب اللي صار قدامي
الحب ضحكة بعينك بس ماطلته


عمرك بهالكون شفت أبسط من احلامي!
القلب لوماخفق لك كان ماشلته


ولوماأنت ملهم قصيدي جفت أقلامي
هذا قصيدي بعينك لو تجاهلته


ينزف على شأن يروي قلبك الضامى
العام طاري غيابك ماتقبلته


واليوم حرماني أصبح مصدر إلهامى
لاتعتذرلي وابنسى كل ماقلته


وش ينفع العذر لامن ضاعت أيامى؟

متعب التركي

ضحيت بالواقع



مرت سنه وشهور وشوية ايام


على غياب اللي حلاها شمالي
كم قلت في نفسي قبل عيني تنام


يارب جبها عند ما أصحى قبالي
تعبت ادور بين حزني والالام


عن صبري اللي بقى منه تالي
يابنت خليت السوالف للاقلام


يكفيك لا عز الكلام انفعالي
من صارت الدنيا حسابات وارقام


وانا عجزت استوعب اللي جرالي
ضحيت بالواقع على شان الاحلام


وضحيت بالغالي على شان غالي
حتى الغرام اللى كسر قلبي العام


ماني بحاله كان ماهو بحالي
ما بنحسب عمر البنادم بالاعوام


بعض السنين نعيش فيها ليالي
وجه التشابه بين وجهك والايام


القلب خالي والليالي خوالي

متعب التركي

العيون السود



رجع بي طاري الذكر على ذيك العيون السود


وأنا اللي قلت ماعاد الهوى يطري على بالي
تناسيتك وشفت الشوق في قلبي عليك يزود


اثرني مانسيتك بس من همي يورالي
غديت وطاري الذكرى سواة الملح والبارود


ليامنه قرب لي ثار شوقي وانقلب حالي
تجي وتروح لكن في ضميري باقي موجود


على حد السراب اللي زما طيفك تروالي
تمر الثانيه في حسبه الساعه على الموعود


اجل ربي يعينك لاغدى راع الوعد غالي
سهيت ولا وعيت الاوقلبي للغلى مشدود


تنبهت وبغيت الحق عليه ولا تهيالي
وانا اللي خابر كل العلوم ونقصها والزود


أضيع في موازين الحكي لا شفتك قبالي
اسامح وادري اني بالجفا مبطي وانا المقصود


وانا اللي لو من اولها جفيتك يمكن اشوالي
على هونك توقا ماهي بكيفك نعيم العود


تحاسبني وانا اللي راحت ايامي على الخالي
حرام تضيع من عمري ليالي مالها مردود


تعابير الشماته شفتها بوجيه عذالي
انا ماني بعاجز لو بجازيك الصدود صدود


يضيق المنزل بغيري ولا غيرت منزالي
كريم النفس حتى بالمشاعر لاعطاك يجود


على كثر العطايا مانشدتك ويش يبقالي
تمهل واعرف اللي راح لا يمكن عليك يعود


خذاه الوقت لاتستنقض المبطي مع التالي
ابقطعها حبالك لو بها حبل الرجا معقود


وابلقا عن مقيلك بالسعه لي في وظلالي

متعب التركي

رغم التعب


رغم التعب والتناقض منزلك عالي


لو كنت في خطوتك تكثر تعاريجك
عنيد لكن عنادك حيل ..يحلالي


لو كان للعند تاج اعلنت تتويجك
لكن ترفق وشوف وجيه..عذااالي


تفرح..تايد صدودك لي.. وتحجيجك
يكفي تشوف بعيونك ثوبي البالي


اللي تمزق تحت قسوة كرابيجك
حزين رددت للاحزان موالي


وانت إتغنى فرح واسمع اهازيجك
لا زلت احبك..ولكن وعد..يالغالي


لابد..اوقف دعاباتك وتهريجك
وإن كنت مهر ..ولا روضك خيالي


. جيت وعلى جثتي عسفك وتسريجك

متعب التركي