ديوان شعراء السعودية في العصر الحديث (متجدد)☘️☘️

مريت الاطراف؟



جابتني الذكرى على الماضي كتاف


سجيت كني توني مكتشفها
سرى بي الهاجس ومريت الاطراف


دوجت حول الساعتين بطرفها
نعم تذكرت الزمان الذي طاف


غديت مثل اللي عيونه طرفها
لي في غرامن فات كلمه ومقياف


لولا خفوقي هام بك ما وقفها
اول غيابك قلت مابي خلاف


واليوم شف حالي غيابك تلفها
تجهل جروحي ياللي جروحك خفاف


معذور لو قلبك جهل ما عرفها
ياليت مجروح الهوى جرحه يشاف


لقول قرب من جروحك وشفها
شفها بعينك كانك من الله تخاف


حاول تصلح غلطتن مقترفها
العمر لامنه خلا منك ينعاف


في حال والا حال غير تعرفها
قدام عينك لو تطلعت وخلاف


تلقى الخفايا خاطري لك كشفها
خايف ومن مثلي معه حق لو خاف


تبعد ونفسي ماتحقق هدفها
ماللهوى عندك مواثيق وانصاف


ماكنه الا لعبتن محترفها
اليوم لو ذكراك ترجع بي خلاف


محبتك سيل التهايم جرفها

متعب التركي

ضايق البال



ضايق البال مايستانس الحاله


وانت لاغبت عني كني الحالي
جتك الاشواق رجليه وخياله


غير الاول تحمل شوقي التالي
ليت من قال متعب خابت اماله


شاف بعيونك الخدرات منزالي
واحدأ فيك ماهو منشغل باله


اشهد انه بها الدنيا هو السالي
راوي العود يزهالك وتزهاله


عاد من يقدر ايلومه إليا مالي
صاحبي والقصايد فيك مختاله


وأنت لك حق فيهن يوم تختالي
دام نفسك لحب الشعر مياله


ليه ماصير شاعر وانت في بالي
من تمناك لاتنشد عن احواله


كيف عقب العسل يستطعم الحالي
عقبك النفس مذعوره ومهتال


هسود الايام هزت برجي العالي
لكن القلب من يمك على حاله


في تناسيك ليه اكذب على حالي
قلت لك نعمة النسيان زواله


ذكرياتك بعضها قام يبرالي
كل مامرني طيفك على فاله


قلت يامرحبا في ريحة الغالي
شلت همك وهمي ماحدأ شاله


كن قلبك غدى ياصاحبي خالي!
إبتعدنا وكلن راح في حاله


بين هالناس لكن كني الحالي

متعب التركي

لاتنشغل



لاتنشغل فيني أنابحالي ادرى


قلبٍ تعلّق فيك ينسى مع الوقت
اكثرمن اللي صارلي ويش يجرى


بين الرجاوالياس فكري تعلّقت
مثلي ولوشفته عن همومه ازرى


ماقال ليتك في جروحه ترافقت
هاك القصايد لاتضايقت واقرى


شف وشكثرفيها لبسماتك اشتقت
أثرالوفا ينباع عندك ويشرى


ماكنت اصدق فيك واليوم صدّقت
يامشتهي فرقا المواليف حذرى


تبعد وأنا من سكرة الحب مافقت
لاطافت الفرصه تحريت الاخرى


وتروح ماكني عليها تشوقت
ساري لو إن الليل مافيه قمرى


اشيل من حمل الهوى فوق ماطقت
لاصارحظ أقشروالايام قشرى


مافيه احد عاقل يلومك إلياضقت
صحيح بعض الناس فرقاه بشرى


وبعض البشرلاغاب ليله تضايقت
ليتك خذيت بليل الاحباب مسرى


غربت من كثر الطواري وشرّقت
السيل يبقاله على القاع مجرى


ويبقالك التذكارلوكنت فارقت
اشوف لك من وين مارحت ذكرى


ولاشفتها صديت عنها ودنقت
ماكل جرحٍ لاخذا أيام يبرى


بعض الجروح يزيد شره مع الوقت

متعب التركي

يقصر الشعر



قلت القصيد وقال لبيك لبيك


على مثل عبدالله اتعب اخيولك
من قبل لا اشوفك واعرفك واحاكيك


اسمع من افواه النشاما فعولك
كلن مدح فعلك عسى الله يعافيك


والناس لولا فزعتك ما عنولك
مافيه مجلس ينذكر فيه طاريك


ألا ورواده بطيب اشهدولك
جيتك وانا اسمع فيك من قبل ماجيك


ودخلت قلبي بس من شفت زولك
جيت ولقيت ان التواضع سمه فيك


عرفت منها وش سبايب قبولك
واحترت مدري ويش اقول بمعاليك


الشعر يقصر طايله ما يطولك
المجد يتبع يابو راشد خطاويك


كنه لكل الناس يعلن وصولك
الطيب مثل ظلال زولك يباريك


وافق ميوله يابو راشد ميولك
لله در الشايب اللي مربيك


ولله در اللي بعد صوتو لك
مافيه طيب ماتمنا يخاويك


لوشفت في قلبه مكانك يهولك
اسمك جمع ناس وقبايل حواليك


ومدوا يديهم لكريم ودعولك
والطيب يلقى عندك وفي حراويك


والا وش اللي يجمع الناس حولك
كم واحدن وده بطيبه يجاريك


حاول ولكنه تثاقل حمولك
ان كان بك عذروب عيبك تماديك


بالطيب وافعلك تجي ضعف قولك
هذا بعض شعري وصف بعض مافيك


الشعر شعري والفعايل فعولك

متعب التركي

مداعبة نسيم الليل



يطول الجفا وتشاغل الخاطر المكسور


ويبقى مع الايام طاريك بلساني
اشوفك بعيني مع غياب وطلوع النور


ذكرني خيالك يوم قلبك تناساني
تذكرت يوم اني معك راضين مسرور


وسجيت مدري هاجسي وين وداني
تخيلتك وفزيت طولي بدون شعور


اثاريه طيفك صار له وقت ماجاني
طرتلي ليالي لو تذكرتها معذور


لو الوقت يرجع كان انا جيتها عاني
يداعب نسيم الليل مجدولك المنثور


تغطيه عني والهوى يكشفه ثاني
تفوح الجدايل مسك مدري عطر وزهور


تعنيك في طولها والشوق عناني
اثر من تولع لو سمع مايطيع الشور


هو اللي يشوف وباقي الناس عمياني
نسيت الليالي ذيك وشلون يامغرور


انا كنت اغالط من يقولون تنساني
هذيك اليالي وين اثر الزمان يدور


رجح في عيونك ذيك الايام ميزاني
انا كيف ابنسى خابرن قلبي المجبور


لو اني نسيتك ماني بناسي احزاني
زمان مضى له دور واليوم غيره دور


انا اليوم مالد النظر لو تعداني
كفى ماجرى ما فيه داعي تجي مشكور


غرام الليالي ذيك خله على شاني

متعب التركي

دليل المحبه



دليل المحبه شوف عيني عليك تغار


ولاودي الحاسد عيونك يطالعها
مع إنك رحلت بعيد لكن بقى التذكار


لياشافته عيني تسابق مدامعها
دفنت الغرام بخافقي والقلوب أسرار


مشاعرهقيت إن الليالي تضيعها
فرحت برجوعك ماطلبت لخطاك اعذار


ونفسي نست ماجرى من تواضعها
تهادت مشاعرخاطري لك بلا معيار


تجاهلتها لوكنت خابر دوافعها
يقولون جنّب درب مالك معه معبار


يلومون نفسٍ بعد لاحباب موجعها
يقولونها قبلي يخون البحر بحّار


والآمواج لاهاجت خذت ماتبي معها
تكاثرت منك الصد وأثرالعلوم كبار


لقيتك على نفسي تقلّب مواجعها
اقوله وأنا اللي شفت ذاك الغلا ينهار


يشوف الندم رجّال نفسه يطاوعها
مثل ماضرب جّوٍ خلا غاي محتار


يدّوج ورجله مادرى وين موقعها
تعرض سموم القيض والدار مامن دار


هليك وشعربالموت روحه ينازعها
جحدت الغلا لين امتلا بالخفوق وثار


قصايد عساها اليوم تطرق مسامعها
غرامك مثل نارٍ حطبها الغلا النار


تموت وغلاك اللي بقلبي يولعها
غلاك بضميري واضحٍ ماعليه غبار


تشيل الغلا نفسي وأنا عاجز امنعها
يقولون ماودعّك:قلت الفراق وصار


والإنسان روحه تنسلب مايودعها!
هذيك الليالي وين أثرالزمن دوار


خذاها ولاظني زماني يرجّعها
طوتها السنين ولابقالي سوى التذكا


لياشافته عيني تسابق مدامعها

متعب التركي

قلوب الرجال



مدرى البارحه ويش إفتكرت وسرحت


هى طوارى والا ان هموم قلبى ثقال
هى طرتلى قديم الذكريات ولمحت


زول والا الحكايه كلبوها خيال
هجّن ركاب فكرى بالمشاعر وصحت


منهو اللى تغافلنى وفك العقال
ضقت والبال عمس ومنقلب فوق تحت


هى من شوى يوم تفوح صفر الدلال
ودى افرح ومن مبطى انا مافرحت


ودى القا عن شموس الحبايب ظلال
كم سنه عقب مركوز النهد مافتحت


قلبى ولا عيونى للغلا والجمال
لو بغيت انتهز فرصات واجد ربحت


كانت اجمل فرص عمرى تنادى تعال
ماهو بعيب لازلّيت والا جنحت


منهو اللى بلغ فينا حدود الكمال
وانت ياللى عن حدود المحبه نزحت


كل ماشد لك حيلى تشد الرحال
ماشكيتك لو انى من جفاك انذبحت


وانت شف حكمة الخالق ذبحك الدلال
لا تقول انك بذاك التصرف مزحت


يوم سويت فى هاك النهار احتفال
ماهجيتك ولا كنى ابد مامدحت


كلبوهن عقب هالعشره اكبر محال
صاحبى دام انا منك وعليك انجرحت


لاتجينى على درب الخطا والخمال
تدرى انى تحمّلت الكثير وسمحت


خابر ان التسامح من كريم الخصال
ليه تفهم غلط وشفيك لبعيد رحت


ماطلبتك تشيل الهم يابن الحلال
ماشغل بالى الا يوم افكر بنحت


القصايد واحفّظها قلوب الرجال
قالوا انى بترويض القوافى نجحت


قلت اجل كيف لو بزعل وامس الحبال
لو تخوّفت من درب الخطر مافلحت


مايهاب الصعاب الا ردى العيال
عكس تيارهم شفنى جزمت وسبحت


ماحرصت انى اترك للتراجع مجال
لو طموحى قريّب من زمااان استرحت


مير خابر محلى فوق روس الجبال

متعب التركي

سر الإبتعاد



الموت هين والبلا وش ورا الموت


عند الحساب .. يهون سهم المنايا
باكر نموت وتصبح قبورنا بيوت


وعقب القصور بضيقات الزوايا
في جوف الارض وكل من حولك سكوت


وتعاقبن بالقبر عوج الحنايا
يارب يا منجي نبيك من الحوت


سترك وعفوك يوم كشف الخفايا
باكر ليا جينا على داعي الصوت


شيبان واطفال وشباب وصبايا
ندعي وحنا بين باكي ومبهوت


ورحنا لها ننقاد مثل السبايا
يا رب تهديني قبل لحظة الفوت


وتغفر ذنوبي يا كريم العطايا
اشكيك هم ٍ داخل الصدر مكبوت


وايامي اللي بالخطايا ملايا
ان لاذ بك من كان طايع ومبخوت


في من يلوذ المرتكب للخطايا؟
يا رب يا قادر على كل طاغوت


لا ياقف اللي وحدوا بك خزايا
رحماك لا منا صحينا من الموت


واليا وقفنا عند بابك عرايا

متعب التركي

خيل القصيد



حسي بلوعات الليالي والاحزان


بعدين حسي بالهوى لا بغيتي
وش به يهمك لو يقولون زعلان


لو فيك ذره من الغلا ماجفيتي
يالي تقولين الخطأ زلت لسان


في زحمة الايام ليه اختفيتي
خطاي وان جه مدري الذنب وش كان


ليه انتهى ذاك الغلا وانتهيتي
وقفت في وجه الزمن قدر الامكان


وانتي جنح فيك الخيال وغفيتي
غلطان انا في كل الاحوال غلطان


اسرجتلك خيل القصيد وسريتي
جيتي وقلت الجرح يوم اقبلت هان


وانتي على الجرح القديم ارتكيتي
قلتي لي الحب ان لابد ينصان


واليوم ماكنك دقايق هويتي
شافوك حساد الهوى شوف الاعيان


يومك على رجم القصايد رقيتي
ما بان لك شي ولا بقا شي ما بان


بس انتي اللي غافله ما دريتي
العام لك طاري بقلبي ولك شان


واليوم احس بغلطتي لا طريتي
وان قدر المولى وعشتي بحرمان


ومن حر لوعات التجافي بكيتي
تذكري قلبن له سنين شفقان


شوفي بحقه ياكثر ما خطيتي
كل القصيد اللي اقوله على شان


تهزك الذكرى عقب ما نسيتي

متعب التركي

مرفوض



مرفوض ياللى بعت غيره عشانه


أزريت عن رد الجزا أو تهاونت
مابي لك أكثر سد باب الميانه


بانت مع الوقت الخفايا وبينت
مادام مالى وسط قلبك مكانه


أنا بعد مثلك عن الحب هونت
أنا مثل خيال خانه حصانه


عذره يقول من الرسن ماتمكنت
غرّه مع المركاض وارخى عنانه


مخطى وانا غلطان يوم انى امنت
لو كنت وافى ماتخون الامانه


ياللى تقول تشيب روحك ولا خنت
ذاك الهوى لو ماشعرت بحنانه


ماكنت فى حلو القصايد تفنّنت
شاعر تزلزل من فراقك كيانه


لك يعترف مايسكن القلب غير انت
اليوم كلن يحتفظ في مكانه


لا كان يوم به عرفتك ولا كنت
لو كان قلبك صافى الود خانه


فى ذمّتى ماهان حبّك ولا هنت
أحدٍ يخون وواحد الوقت خانه


أنا ترى الثانى وألاوّل تراه أنت

متعب التركي